Manchester City manager Pep Guardiola chuan City rawlthar duhawm tak kum 18 mi Phil Foden chu a faka, Guardiola hian City a zawm tirh te atangin Foden hi a sial bik tih a hriat nghal thu a sawi.

Inrinni liamta khan City hian Premier League inkhel pawimawh takah Tottenham an lo mikhual a, si khat faiin City hi chakin goal awmchhun khungtu hi Foden a ni a, a Premier League goal hmasa ber a ni nghe nghe.

Guardiola chuan Foden-a chungchang sawiin, “Foden hi mi bik a ni a, ka hmuh tirh phat khan a sial bik tih ka hre nghal. City ka rawn thlen hmasak ber ni khan Txiki chuan , ‘Player pakhat kum 15 emaw 16 mi vel i hmuh ngei ngei tur a awm’ min ti a, Foden ka hmuh hnu khan Txiki hnenah Foden chu tha ka tih thu ka sawi nghal bawk,” a ti.

Sawi zelin Guardiola chuan, “Mahse player naupangte hi enkawl fimkhur an ngai em em a, an than chak ang bawkin an tlahniam chak a ni. A khelh apiangin Foden hi a khel tha thin a, game lian tak takah pawh a theuneu loh zia kan hmu tawh. Training-naah nitin ka hmu a, eng emaw dawn bik hi a nei a ni ber. Player ka nih lai leh manager ka nih hnuah player tam tak ka lo hre tawh a, mahse ani hi chu a danglam bik a ni,” a ti.

Foden hi Manchester City academy chhuak a ni a, City tan bak loan ang pawhin khawiah mah a la khel ngai lo. Kum 2017 atang khan City senior team tan a inlan tan a, season tinin hma a sawna, a khel tam telh telh bawk. England –in kum 2017-a Under 17 World-a nomawi an chawi tum khan Foden hi an ‘star’ player a ni a, Golden Ball lawmman a dawng nghe nghe a ni.