A tha ber pawl ka nih vangin Bayern hian min lei: Pavard

23rd April 2019, 01:04AM

Benjamin Pavard chuan khawvela footballer tha berte zinga mi a nih avangin Bayern Munich chuan an lei niin a sawi.

Kumin January thla khan Bayern Munich chuan Stuttgart chu an bia a, Benjamin Pavard hi tun season tawpa la lut turin €35 million vel bawrin an inrem a. Season tawp hunah Niko Kovac te chu Pavard hian a zawm thei dawn a ni.

Season liam taah khan Pavard hian Bundesliga boruak a chhim ve tan a, a che tha thawkhat hle nghe nghe a. Russia rama FIFA World Cup an khelhah khan France tan khelin player langsar pawl a ni thei bawk a, last 16-a Argentina an hneh tumin goal mawi zet mai a thun nghe nghe a ni.

Pavard chuan Bayern Munich in an duh chhan chu 2018 World Cup-a a chet that vang mai chu a nih loh thu sawiin, defender tha ber pawl a nih vanga lei an nih thu a sawi a. Allianz Arena-ah chuan chanchin duhawm tak a neih chhoh theih ngei a rin thu a sawi zui bawk.

“Bayern ka zawm chhan hi World Cup-a ka chet that vang chauh kha a ni hauh lo a. Tun dinhmunah chuan Bundesliga defender tha ber pawl ka ni a, ka chak hle a, technical lamah lah ka tha tel bawk si a, hei vanga min lak luh duh hi an ni,” tiin a sawi.

“Ka inring tawk em em mai a, title tam thei ang ber lak ka duh bawk a. World Cup-a kan champion hnu khan trophy dang pawh lak belh zel ka duh zual a. A hma zawng aia hlawhtling lehzual thei tur chuan ka tan Bayern Munich pan tluka fuh a awm dawn lo tih hi ka ngaihdan a ni a, club dang pan kha ka rilruah a lang lo reng reng,” a ti bawk.

A sawi zelnaah, “Bayern te ang club lian chu tu tan mah hnar chi a ni lo a, Germany ramah chuan anni aia club tha an awm lo a, title eng emaw zat hi an la deuh reng mai a ni ber,” a ti.

Tun season chhungin Pavard hian Bundesliga game 25 a khel tawh a, Stuttgart chu an che tha lem lo hle a, tunah hian a mawng lamah awmin, relegate theih dinhmunah an ding mek a. Inrinni khan Augsburg nen an inkhel a, 0-6 ngawtin an tlawm a, coach Markus Weinzierl chuan a hna a chan phah nghe nghe a ni.

Engtik lai pawhin a khel tha reng bik lo niin Pavard chuan a sawi a, mahse miin an sawisel fo chu dik lo a tih thu a sawi tel.

Kum 23-a upa Pavard chuan, “Helai hmuna awm hi thil hahdam leh awlsam tak a ni dawn lo tih chu ka hre sa a, season hautak zet kan hmachhawn kha ka ring sa hrim hrim a. Mi tam tak chuan min sawisel nasa tan hle a, mahse heng zinga mi tlemte chauh hian ka inkhel lai hi an en thinin ka ring a. Tihsual chu ka nei ve zeuh zeuh a, mahse a tam zawkah chuan ka che chhe vak ngai lo a ni,” a ti.

Copyright © inkhel.com 2024. All rights reserved.