Tun hnaiah RB Leipzig striker Timo Werner-a’n Liverpool chu khawvela club tha ber an nih mek thu a sawia, hemi chungchangah Liverpool manager Jurgen Klopp chuan team tha ber an nih loh thu a sawia, mahse team tha ber zinga pakhat an nih thu a sawi bawk.

Liverpool hi tun season-ah a bikin Premier League-ah an che tha hle a, tunah hian khelh 26 khel tawhin point 19 laiin hma an hruaia, vawi khat an inhnehtawk tih loh chu an la chak fai vek. Liverpool hi an kal tlaung zel a nih chuan March thla hian an champion fel tawh dawna, Premier League-ah record an siam ngei dawn.

Klopp chuan khawvela team tha ber an nih leh nih loh zawhna chhangin, “Khawvela team tha ber anga min sawi te hi keichuan ka hrethiam ve chiah lo. Mahse heti ang tawngkam hriat hi chu a nuama, team chhe ber anga min sawi ai ngawt chuan hriat a nuam tih chu thil hriat sa a ni.

“Miin khawvela team tha ber an sawi chuan kum tlemte liamtaa Real Madrid team te, kum tlemte kal taa Barcelona team emaw, kum hnih liamta chhunga Manchester City team emaw te kha rilru ah a lo lang thin.

“Tuna kan team hi chu kan rilru put hmang a dika, kan bei nasa a, chu chu player tha tak nen an inchawhpawlh a ni. Khawvel thlir dana ka thlir chuan Liverpool hian club tha ber ber te zinga pakhat kan ni,” a ti.

Werner-a chungchang sawi zuiin Klopp chuan, “Player te’n kan hlawhtling tih an hriat chuan biak pawh an awlsam bik a, mahse a lehlamah chuan team tha kan ni tih an hriat chuan an khelhna hmun tur leh inkhelhna hmun an chan dawn leh chan dawn loh an ngaihtuah tel thin.

“Keini chuan kan zinga lo tel duh; an hmun tur sual chhuak ngam kan duh a, hmasawn zela hmalam pan zel hi kan tum ber a ni. Chuti ang rilru pu player-te kan kawl meka, min rawn zawm duh te chuan heti ang rilru chiah hi an put ve a ngai a ni,” a ti.