Manchester City captain hlui Vincent Kompany chuan tun nipui khan City chhuahsanin a club hlui Anderlecht lamah player-coach ni turin a kal a, nimin lam khan Vincent Kompany’s Testomonial match chu Kompany-a tan khelh a ni.
He inkhelah hian Manchester City legends XI leh Premier League legends-te an intuma, team hnihte hi 2-2 in an inhnehtawk.
Kum 33 mi Kompany chu he inkhela tel ve ngei tur a nih laiin, hamstring injury a nei leh ta si a, a testimonial match-ah hian a inlan thei ta lova, a mah pawhin pawi a tiin a khawngaihthlak hle.
He inkhel hi City home ground Etihad Stadium-a neih a ni a, mi 51,000 laiin a hmunah enin, player hlui leh mi lar tam takte chu entu zingah hian an tel.
City legend-te hi tuna City boss ni mek Pep Guardiola chuan a manage a, Premier League legend lam hian Belgium coach Roberto Martinez chuan a manage ve thung.
City lam hian goal an khung hmasa a, Martin Petrov chuan City hi hma hruai puiin, Robbie Keane chuan Premier League legends lam si phurh a rul. Robin van Persie chuan Premier League lam hi hma a hruaipui ve leh a, Benjani chuan City lam si phurh sut ve lehin 2-2 in an inhnehtawk ta a ni.
Line up:
Man City: Hart, Zabaleta, Toure, Lescott, de Jong, Nasri, Ireland, Silva, Wright-Phillips, Aguero, Petrov.
Premier League: Van der Sar, Neville, Carragher, Carrick, Cole, Arteta, Butt, Scholes, Giggs, Keane, van Persie.