15 Mar 2019 05:06

inkhel

A sang pathuma awm leh FA Cup final luh kan tum: Romero

Manchester United chuan Premier League club chungnung pathum zinga tel an tum bakah FA Cup champion nih an tum hle niin Sergio Romero chuan a sawi.

Jose Mourinho hnuaiah Red Devils chu an tlahniam tial tial a, hei vang hian club thuneitute chuan an ban a. A hmun ruak luah tura Ole Gunnar Solskjaer an lak luh hnuah hma an sawn nasa hle a, season tawpah dinhmun tha taka din theih an inbeisei tawh hle a ni.

Inrinni hian Manchester United chuan FA Cup quarter final-ah Wolves an hmachhawn dawn a, hetah pawh hian chak theih ngei an inbeisei viau a. Argentine goalkeeper Sergio Romero chuan, “Kan hmabak hi a phurawm hlein ka hria a, theihtawp kan chhuah ang a, kan chak theih ngei pawh ka ring,” a ti.

“Tunah tak hi chuan Premier League-ah a chungnung pali zinga tel theih kan tum mek a, season tawpah phei chuan a sang pathum zinga tel theih kan inbeisei chho bawk a. Champions League-ah kan hmachhawn tur a hriat theih dawn hnai tawh a, kan khelhpui turte hi hriat vat vat a chakawm tawh khawp mai,” a ti bawk.

A sawi zelnaah, “FA Cup hi inelna pawimawh tak mai a ni a, Inrinni hian game lian tak mai kan khel dawn a, Wolves nen chak zawk zawn a ngai a. Khelmualah theihtawp kan chhuah ang a, chak zawk nih ngei hi kan tum dawn a, semi final luh theih kan tum hle a. Kuminah champion theih hi kan inbeisei ve khawp mai,” a ti.

Romero chuan, “Arsenal leh Chelsea khelmualah te kan duh angin kan che thei lo a, mahse heng game hnihah te hian kan khel chhe lem lo hle a. Wolves khelmualah pawh inthlahdah chi a ni dawn lo tih kan hria a, mahse kan inringtawk a, he trophy hi kan tan a pawimawh tih kan hre bawk a ni,” a ti.

“He inelna hi a tawp thlenga khelh kan tum a, final luh ngei hi kan tum viau a, kan duhthusamah chuan champion theih a, he club kaihhnawih mi leh sate lawmna siam hi kan duh ber a ni,” a ti bawk.

Ole Gunnar Solskjaer chuan Old Trafford-a awm nghet thei turin eng trophy emaw ber lak theih a tum hle dawn a, FA Cup ah pawh Romero sawi ang deuhin inthlahdah chu a duh hauh lo ang tih a rin theih a ni.