A sang pali zinga kan tel chuan thil mak tak a ni ang: Mourinho

04th December 2018, 10:12PM

Jose Mourinho chuan Manchester United chu Premier League club chungnung pali zingah an tel thei a nih chuan thil mak tak a nih tur thu a sawi.

Manchester United chu tunah hian Premier League-ah pasarihna an ni mek a, palinaa awm Arsenal aiin point 8 in an hniam tawh a, anni pahnih hi Nilai zanah an inhmachhawn dawn a ni.

United hian November 3 hnuah chak hmel an la hmu leh miah lo a, Premier League game an khelh hnuhnun pahnihah Crystal Palace leh Southampton te nen an inhnehtawk zui a ni.

St. Mary’s Stadium-a Southampton nen 2-2 a an inhnehtawk hnuah Mourinho chuan, “Nikum khan pahnihna kan ni thei a, kan team dinhmun enin khatiang kan thleng thei kha ropui kan tih thu kan sawi nasa hle a. Team dangte nen khaikhin ralah chuan kan team lakah hian beisei san vak chi a ni lo a ni,” a ti.

“A chungnung pali nih tum dangte leh kan team te hi khaikhin dawn ta ila, keini chu fak vak tur kan awm hauh lo ang a. Tunah chuan tih theih kan nei tlem hle a, point tam thei ang ber hmuh kan tum dawn a, season tawpah a sang pali zinga kan tel thei a nih ngat chuan thil mak tak a ni ngei ang,” a ti bawk.

England striker hlui Chris Sutton chuan Mourinho chu ban cho viau ni awm taka a khawsak thu a sawi a. Mourinho leh player te inkar boruak chuan sawi a hlawh zual zel a, Inrinnia an chak zawh loh hnuah phei chuan boruak a sang leh viau a ni.

Chris Sutton chuan, “Mourinho boruak hi an team inkhel ai chuan ngaihven tlak zawk niin ka hria a, United in khelmuala point an hmuh aiin khelmual pawn lama Mourinho khawsak dan hian point a keng hnem zawk tlat a ni,” a ti a.

“January thlaah hian eng thil nge thleng dawn? A kuta pawisa tam deuh dah ngam chi a ni ang em? Ka hmuh dan chuan club hian ban se a ti niin a lang a. A player lei te hian awmzia an nei lo hlawm a, chuti chung chuan pawisa tam tak a duh belh zel a. Tun season-ah an che chhe hle a, manager lah chuan puh tur a zawng chawp ruai reng ringawt mai a ni,” a ti bawk.

Copyright © inkhel.com 2024. All rights reserved.