Hammers centre forward Diafra Sakho chuan a ngaihzawng thahah a vau avangin Pathianni liamta khan an man tih The Sun chuan a chhuah.
Sakho ngaihzawng hi Mya Hassan niin a rai mek nia sawi a ni bawk.
Metropolitan Police thuphuangtu chuan Pathianni, ni 23 August zan khan Havering officer te chuan mahni ngaihzawng thaha a vau avangin mi pakhat an man a, kum 25 a upa niin Emerson Park, Hornchurch hmunah an man. East London police station ah hruai niin bail a chhuahtir leh hrih a ni tiin a sawi.
Sakho-a mi leh sa te pawh The Sun chuan an kawm ve bawka, Sakho chu thubuai siam sak a la nih loh thu leh a thiltih nia an sawi chu thu dik lo a nih thu te, police te hnenah chiang taka engkim a sawi vek thu te a sawi a, thu belh a neih dawn hrih loh thu a sawi bawk.
West Ham tan he thu hi thu hriat nuam loh tak a nih a rinawma, Arsenal hnehin Premier League season bul tan tha hle mahse Leicester leh Bournemouth lakah an tlawm leh der tawh lai he thu hian a den zui avangin club boruak a tha hrih lo dawn hle a ni.