24 Nov 2017 11:40

inkhel

A letin Pistorius tan hun chhung tur tipung

South African court chuan a bialnu a thah vanga kum ruk chhung tang tura an tih tawh Oscar Pistorius thubuai an ennawn a, kum 13 leh thla nga chhung tang zawk turin an ti.

Olympic athlete Pistorius hian kum 2013 Valentines day khan a bialnu Reeva Steenkamp chu silai hmangin a kaphlum a, thubuai siamsak anih hnuah a kah chhan hi rukru emaw a tih vang niin a sawi.

Kum 2014 March thla ațang khan a chungthu hi ngaihtuah țan niin September-ah thil a tisual ngei tih court-in an pawm a, October thlaah mihringpui sawisak thubuai vangin kum nga chhung tang tura tih a ni.

Court-in a chungthu an rel fel tawh hnu hian boruak erawh ala awm reng a, kum 2015 October thla khan pawnchhuak thei lo tura thupek niin December thlaah tualthah vanga thiamloh chantir a ni zui.

Kum 2016 July thla khan a chungchang hi ngaihtuah leh niin kum ruk chhung tanina tang turin an rel a, hei hi amah dodaltute chuan tlem lutuk tiin an khing a Supreme Court of Appeal chuan thutlukna dang siam lehin kum 13 leh thla nga chhung tang tura tih a ni ta a ni.

Pistorius hian Pretoria-a an chenna hmunah a bialnu Steenkamp hi vawi li lai a kap a, thu tlukna thar chhuak vang hian Steenkamp-i chhungte chuan diktaka rorel a ni ta niin an sawi.

Pistorius hian Paralympic-ah gold medal paruk ala tawh a, kum 2012 khan London Olympics-ah tel vein mi ke bul chunga Olympics-a tel hmasa ber a ni nghe nghe.

A ke hi a naupanlaiin a khup hnuaiah an tan a, silai a hmehpuah hmaa vauna emaw thawm a neihloh avangin dem a hlawh phah em em bawk a ni.