Saudi Arabian club Al Nassr striker Cristiano Ronaldo chuan, Manchester United-ah khan hun khirh tak a tawng tih a sawi a, a chhuah hnuah a hma aia a chak zawk thu a sawi bawk.

United in nikuma Erik ten Hag an rawih hnuah Ronaldo hian Manchester United-ah inkhelhna hmun a chang tlem chho viau a, hemi avang hian Ronaldo hi a vui hle nghe nghe.

Piers Morgan-a’n a kawmnaah Ronaldo hian insum lovin an manager leh United sawiselin, hemi avang hian United pawhin a contract an tihtawp sak zui a, Qatar World Cup zawhah Ronaldo hi Old Trafford-ah a kir leh tawh lo.

United-in an chhuah tir hnuah kum 38 mi hi Saudi Arabian club Al Nassr chuan an lalut a, Al Nassr tan hian game 8 a khelh tawh atangin goal 8 a khung tawha, assist vawi 2 a nei tawh a ni.

Portugal captain Ronaldo chuan, “Ka career-ah hun khirh ka tawng tih hi ka pha lova, mahse inchhirna hun erawh ka nei lo. Nun chu a kal zela, ka duhdanin a kal emaw, a kal lo emaw ka than zelna kawng a ni. Tlang chhipa kan awm hian a chang chuan tlang mawnga thil awm kan hmu thei lo fo thin. Tunah chuan a hma aiin ka inpeih a, ka inzirna kha a pawimawh em em a, a chhan chu khatiang kha ka la paltlang ngai lo. Tunah chuan a hma aiin mi tha zawk ka ni a, ka chak zawk a ni,” tiin a sawi.