Ole Gunnar Solskjaer chuan Manchester United chu an rawn che tha tawh tura a ngaih thu sawiin, a chungnung pali zinga tel theih beiseina an neih san thu a sawi.

Manchester United chuan season tharah UEFA Champions League khelh theih ngei an tum hle a, hetiang ti thei dinhmuna ding tur hian tun season chhungin Premier League-ah a chungnung pali zinga an tel a ngai a ni.

February 1 ah khan Manchester United chuan Old Trafford-ah Wolverhampton Wanderers an lo mikhual a, hemi tumah hian goal thun loin an inhnehtawk a, hei vang hian hetih laia palinaa awm Chelsea hnaih theihna hun tha an neih chu an hmang tangkai thei ta lo a ni.

Tun season chhungin United chuan Chelsea chu vawi hnih an hneh tawh a, hei bakah hian Manchester City, Tottenham leh Leicester City te pawh an hneh tawh bawk a. Hetih rual hian club te deuh zawka ngaihte lakah result tha vak lo an nei leh thin a, hei vang hian an beisei dinhmunah an la ding thei meuh lo a ni.

Solskjaer chuan, “Thlasik chhunga inkhelh chawlh kha kan hmang tha hle a, tunah chuan tha tharin kan rawn kir leh tawh dawn a. Kar hnih chhung training neih paha inkhelh chawlh kha kan mamawh a, kha vang khan mi thar ang chiah kan ni leh tawh a ni,” a ti.

“Inkhelh chawlh kan hmang kha kan hlawkpui hle ang tih ka ring a, keini chauh ni loin Premier League club dangte pawhin an tangkaipui hlawm hle turah ka ngai a. Training tha tak kan nei a, theihtawp kan chhuah bawk a, a hma ai khan kan ziaawm daih tawh dawn a ni,” a ti bawk.

“Marbella kha a changkang hle a, tha takin min lo enkawl a, player te pawhin nuam an ti hle a. Kan team kawi khawm dan tha tak a ni e,” tiin a sawi a ni.