Rafael Nadal chu a vanglaia a vawi 8-na atan dinhmun chungnung berah a awm leh tawh a, ATP ranking thar berah World No. 1 a ni leh tawh.
Pathianniah khan World No. 1 dinhmuna ding Novak Djokovic chuan Canadian Denis Shapovalov chu 6-3, 6-4 in a hneh a, Paris Masters title a la a, heti chung hian Serbian star hi Spanish star Nadal hian a lehpel thei ta tho a ni.
Paris Masters semi final-ah Nadal chu Shapovalov nen an inhmachhawn a, a inhliam avangin a inhnukdawk a. Inhnukdawk ta mah se November 4, 2018 hnua a vawi khatna atan khawvela mipa tennis player zinga chungnung ber hi a ni leh thei ta tho a ni.
2019 chhungin Nadal leh Djokovic te chu an intluk tawk angreng hle a, Spaniard Nadal hian French Open leh US Open title te a la tawh a, Serbian Djokovic chuan Australian Open leh Wimbledon title te a la tawh bawk a. Kumin kum tawpah World No. 1 nih theih tumin beihpui an thlak ve ve a ni.
Nadal hi World Tour Finals-ah a tel lo emaw, round-robin match ah a chak zo lo emaw a nih a Djokovic hi group stage-ah vawi hnih tal a chak a, final a lut a nih chuan Nadal ai hian a chungnung thei dawn a ni.
Rafael Nadal hian August 18, 2008 ah khan kum 22 mi niin World No. 1 nihna hi a chelh tan a, a chungnung berah hian kar 197 ngawt chu a awm tawh a, he dinhmun chelh rei kawngah hian parukna a ni a. Roger Federer (310), Peter Sampras (286), Novak Djokovic (275), Ivan Lendl (270) leh Jimmy Connors (268) te chu a la tluk lo a ni.
ATP rankings:
1. Rafael Nadal (ESP) 9,585 pts (+1)
2. Novak Djokovic (SRB) 8,945 (-1)
3. Roger Federer (SUI) 6,190
4. Daniil Medvedev (RUS) 5,705
5. Dominic Thiem (AUT) 5,025
6. Stefanos Tsitsipas (GRE) 4,000 (+1)
7. Alexander Zverev (GER) 2,945 (-1)
8. Matteo Berrettini (ITA) 2,670 (+1)
9. Roberto Bautista (ESP) 2,540 (+1)
10. Gael Monfils (FRA) 2,530 (+3)
11. David Goffin (BEL) 2,335 (+3)
12. Fabio Fognini (ITA) 2,290
13. Kei Nishikori (JPN) 2,180 (-2)
14. Diego Schwartzman (ARG) 2,125 (+1)
15. Denis Shapovalov (CAN) 2,050 (+13)
16. Stan Wawrinka (SUI) 2,000
17. Karen Khachanov (RUS) 1,840 (-9)
18. Alex De Minaur (AUS) 1,775
19. John Isner (USA) 1,770 (-2)
20. Grigor Dimitrov (BUL) 1,747 (+7)