24 Jul 2019 01:41

bakteaJr.

Mizo tlangval

​A chak loh hnuah Russian boxer Dadashev boral

Russian boxer Maxin Dadashev chuan kar liamta Zirtawpnia Subriel Matias nen an inhnek zawh hnuah a hliam tuar lovin a boral.

Dadashev leh Matias-te hi MGM National Harbour, Maruland, USA-ah kar liamta khan an inhneka, Matias hi round 11-naah a chak.

An inhnek zawha, arena a chhuahsan laiin Dadashev hi a tlu a, damdawiin lam panpui nghal niin ICU-ah dah a ni a, a thluaka thisen zam chatin nimin lam khan a boral.

Dadashev-a thluak hi a vung nasa hle a, damdawiin panpui a nih hnuin emergency-a zai a ni a, mahse a damchhuak zo ta lo.

Kum 28 mi Dadashev hi California-ah a nupui Elizabeth nen an cheng meka,fa pakhat Daniel an nei a, a nupui leh a fapa neihchhun a boral san ta a ni.

Dadashev hian Matias a hneh loh hma hian fight 13 a nei hmana, heng fight 13-ah hian hnehna a chang vek.

Professional boxing a luhchilh hma in Dadashev hian Russian championships-ah silver medal leh bronze medal a lo la tawh a, Matias nen an inhnek tum hian a trainer Buddy McGirt chuan round 11-naah Dadashev hi inhnek tawp turin a ti a, inhnek hi tihtawp a ni ta a ni.