Erik ten Hag chuan thla 9 lek Manchester United a enkawl hnuin, Pathianni zan khan Carabao Cup a chawipui nghal a.

Kum 2017 hnuah a vawi khat nan Manchester United chuan trophy an chawi ve leh ta. League Cup final-ah hian si hnih faiin Newcastle United an hneh a.

Casemiro chuan goal hmasa zawk a khung a, Rashford-a shot chu Botman chuan an lamah a khak lut ve leh bawk a, harsatna lian tawk loin Manchester United hi an chak ta a ni.

Inkhelh zawhah kum 53 mi Erik ten Hag chuan, "A hmasa berah chuan, trophy kan chawi theih hmasa te kan chawi ang, chu chu vawiinah kan ti ta.

"Hei hian nasa takin mahni inrintawkna min pe a, Manchester United din thar leh tur hian bul kan tan chho mek a ni.

"United din thar a nih leh dawn chuan, trophy kan chawi zel a ngai dawn, vawiinah pakhat chu kan han chawi ta phawt chu a ni a.

"He trophy hi kan tan chuan a hlu em em, UK-a ka luhtirh pawh khan trophy kan chawi hi ka ring em em. 

"Kan hlim ang a, kan champion kan lawm ang. A hnuah erawh hna kan thawk leh nghal char char ang," tiin a sawi.

La Liga hmahruaitu Barcelona an hneh atanga ni thum lekah final an khel, tlemin an chau ve deuh maithei tia football pudit ten an sawi laiin, tha takin Newcastle United an hmachhawn leh thei a.

"Kan game kha a tha khawp mai, theihna kan nei a, tharum mai bakah rilru lamah pawh theihna sang tak kan nei, thahrui kan nei a ni, kan khel tha tak zet," tiin ten Hag chuan a sawi bawk.

Ajax atanga Manchester United a pan dan a sawi chhuak leh a. "Ajax chhuahsan a, Manchester United pan kha ka tan chuan risk a sang khawp mai.

"A nihna takah chuan Netherlands-ah khan nuam ka ti a. Chutih laiin Manchester United hi ka ngaina a, an jersey te hi a danglam bik a. Tin, Alex Ferguson-a'n ropui taka a lo kaihhruai tawh dan te a ropui ka ti.

"He team hian danglam bikna a neih leh a ngai, United enkawl hna ka koah a rawn tla ta chiah a, kei chuan he club hi ka tana tha ber tur a niin ka ngai nghal hmiah, chuti chuan, an zinga tel ve ka thlang ta a ni," tiin Ten Hag chuan an champion zawhah a sawi.