Leroy Sane chuan season thar tan leh turin duhthusamin a la inpeih chiah loh thu sawiin, tun dinhmunah chuan 80% vela a inpeih thu a sawi.

Bayern Munich leh Germany midfielder Leroy Sane hian Manchester City atangin Bundesliga club chu €60 million in a zawm a. Nikum August thlaa Manchester City leh Liverpool in Community Shield an khelh tum khan Sane hian a khup a tina a, hei vang hian a duh anga hmain a khelhna club hi a thlak theih loh phah a ni.

Kum 24-a upa Sane hian khelmuala chet ve theih hun a nghakhlel tawh hle a, Lisbon khawpuia UEFA Champions League title an lak pawh khan a entu a la ni chauh a, Bayern Munich tana khelh theih hun chu a nghahhlelh thu a sawi a ni.

Nations League ah Die Mannschaft chuan Spain an hmachhawn dawn a, Sane hian Germany tana khelh theih a chak thu a sawi a ni.

“Hma ka sawn chak viau a, ka dam tawh khawp mai. Tun dinhmunah chuan duhthusamin ka la inpeih chiah lo a, 80% velin ka inpeih tawh a. Rei vak loah chuan 100% hi ka nih theih mai ka beisei a, ka che vel pawh a dik chho leh tan tawh khawp mai,” tiin Sane chuan a sawi chhuak.

“Season liam ta kha chu ka tan season tha tak a ni lo chiang hle a. Ka inhliam phawt a, chumi hnuah coronavirus a rawn darh leh a, khelmuala chet theihna hun kha ka nei lo rei viau a. Bayern Munich lamah ka kal thei ta hlauh kha a fuh awm chhun a ni deuh ber mai,” a ti bawk.

A sawi zelnaah, “Kum hautak zet mai ka hmang a tih theih a, chutih rualin thil eng eng emaw ka hriat chian theih phah a, keimah ka inhriat chian theihna pawimawh tak pawh a ni,” a ti.

2018 FIFA World Cup ah khan Sane hi Germany squad-ah an telh ve lo a, mak tih pawh a hlawh hle a. An ram tan vawi 21 chu a feh chhuak ve tawh a, an koh hnuhnun ber chu June 2019 ah khan a ni.