24 Apr 2019 05:34

inkhel

76ers hi NBA Finals-ah kan chak thei ang: Joel Embiid

Joel Embiid chuan kuminah an chet that tluanchhuah theih a rin thu sawiin, NBA Finals-ah an chak theih a rin thu a sawi.

Philadelphia 76ers chuan Game 5 ah Brooklyn Nets chu 122-100 in an hneh a, Eastern Conference semi final an lut a. Semi final an luh takah chuan Embiid hian a tawp an thlen theih a rin thu hi a sawi chhuak a ni.

76ers leh Brooklyn Nets inkhelah hian Embiid chuan point 23 a thun a, rebound 13 a la bawk a, Nets nen game 5 an khelhah 76ers hi 4-1 in an chak a, second round-ah Toronto Raptors nen an inkhel dawn a ni.

An chak hnuah All-Star Embiid chuan inrintawkna an neih that tawh thu sawiin, a tawp thlenga an chak theih a rin thu hi chanchinthar lakhawmtute a hrilh zui a ni.

Embiid chuan, “Ka rin dan chuan a tawp thlengin kan chak thei ang a. Kumina kan team hi nikum lam team aiin kan tha zawk daih bawk a, hetiang a nih vang hian champion loh chu hmabak kan nei loin ka hria,” a ti.

“Nikumah khan kan che fuh chho viau dawn nia kan inngaih laiin, Boston khan kan zinkawng an titawp daih a. Tun tum hi chu a dan a dang ta deuh a, kuminah chuan ka vawi hnih telna a ni ve ta a, nikumah kha chuan kan inring leh lutuk mah mah a, kan chetsual phah,” a ti bawk.

A sawi zelnaah, “Kuminah chuan engkim hi a dan a dang vek tawh a, kan tih apiang hi pawngpaw zuam vek kan tum tawh lo a, zahawm tak leh zai ngai takin kan che zel dawn a. Theihtawp chhuahin basketball chawisan pahin kan khel zel dawn a ni,” a ti.

Tun hnaiah Embiid chu a khup na vangin duh angin a che lo thin a. Game 1 ah a che hleithei lo a, Philadelphia chu an chak lo nghe nghe a. Game 3 phei chu a khel ve ta lo a, Game 4 an khelhin a tel ve leh a, hetah hian point 31 a score bakah rebound 16 a la a, 76ers chu a chakpui a ni.

“Zinkawng thui tak zawh tur ka la nei a, mahse ka dam a nih phawt chuan theihtawpin hlawhtling zel turin beih ka tum a ni,” tiin Embiid chuan a sawi.