Rap legend 50 Cent chu MMA khawvelah a zuang lut thut thei niin an sawi a, a lut a nih chuan Rampage Jackson nen inhmachhawn thei dinhmunah a ding.
50 Cent hi May 4 khan MMA boss Scott Coker nen an indawr a, darkar hnih zet an inkawm a, an inbiak tawp lamah hian contract an ziak niin a lang a. Rapper hian thil lian tham deuh a buaipui thu sawiin, mi zawng zawng a barakhaih tur thu a sawi tel bawk a ni.
Bellator MMA president Scott Coker chuan, “50 Cent hnenah khan fighter kan lakluh dan kalphung zawng zawng te leh infiammi kan buatsaih chhoh dan leh kan hrual zui dan te ka sawipui bakah free agent kan lakluh dan te ka hrilh a ni,” a ti a.
A sawi zelnaah, “MMA chungchang a ngaihven a, kan thil sawiah khan a tui hle a. Zawhna pawh a ngah a, a zawhna neihte kha zawhna tha tak tak an ni hlawm nghe nghe a. Mixed martial arts hi a thinlung takin a tuipui hle niin ka hria,” a ti bawk.
50 Cent hi a hming tak chu Curtis Jackson a ni a, 2012 khan boxing promotion lampang a buaipui tan a, boxer tha deuh deuh chu an ziaklut teuh hman a. Mahse, mi thenkhatin court lama khin an tum avangin boruak neuh neuh a awm a, an company chu an titawp leh daih a ni.
Curtis Jackson hi rimawi khawvela a luh hma chuan boxer a ni thin a, Floyd Mayweather nen tang kawpin featherweight champion hlui Yuriokis Gamboa leh middleweight Olympic medallist Andre Dirrell te chu a lo kaihruai tawh a ni.
MMA khawvelah pawh 50 Cent hian Rampage Jackson chu a hmachhawn maithei niin an sawi hlawm a. WWE veteran CM Punk pawhin UFC a luhchilh tawh a, chuvangin 50 Cent hi MMA khawvela kan hmu a nih pawhin thil mak a ni hauh lo ang.
Curtis ‘50 Cent’ Jackson hian Instagram-ah Bellator MMA heavyweight Rampage Jackson hi a cho thu a ziak der tawh a. “Jackson tih hming pu rau rauah tu hi nge rothap zawk tih hi sawi vak a ngai lo, keimah ka ni mai. Pawisa a awm phawt chuan Rampage hi a rawn pen chhuah ngei a ngai ang a, harsatnain a hmachhawn ngei ang,” a ti.
Hemi chungchangah hian Pride FC veteran leh UFC light heavyweight champion Rampage Jackson (37-11) hian engmah sawi chhuah a la nei ve lo a ni.