Gareth Bale chu Real Madrid chuan £5 million-a hawh chhuah an phal dawn hnai a, hun rei tak amah beiseitu ni tawh Manchester United chuan an hawh duh mai an ring hle.

Tun hnaiah Gareth Bale chu a dinhmun a derthawng chho hle a, Real Madrid coach thar Zinedine Zidane chuan season thar atan an mamawh vak loh tur thu a sawi chhuak hial tawh a. Bale hi lei duhtu an awm lo a nih pawhin Los Blancos chuan a duhtu tan hawh theiha siam an tum tho a ni.

Spain rama chanchinbu lar Marca chuan Bale hi Real Madrid chuan an hralh thei ta lo a nih pawha loan-a chhuahtir tho dan an ngaihtuah tur thu hi an tarlang a. Manchester United chuan hun rei tawh tak atang khan Bale hi an lo ngaihven tawh a, Sir Alex Ferguson khan Southampton atanga lak luh kha a lo tum tawh a, mahse Welsh star hian Tottenham Hotspur zawm kha a thlang ta zawk a ni.

2013 khan Manchester United chuan Spurs chu Welsh winger lei hi an lo dil tawh a, Real Madrid ai pawhin sum an tawktarh hnem zawk a. Mahse, Gareth Bale chuan Madrid khawpui lama kal a chak zawk a, hei bakah Spurs chairman Daniel Levy chuan an hmelma club hnena player tha hralh kha a remti chiah lo bawk a ni.

United boss hlui Jose Mourinho pawh khan kum hnih kalta khan Bale chu Old Trafford lama thlem luh dan a ngaihtuah tawh bawk a. Hun rei tak an lo hel tawh chu tunah chuan sum tam lutuk lo senga chhawr theihna hun tha an nei ve dawn niin a lang.

Bale hi tunah chuan Real Madrid hian €175 million vel an chhiar mek a, an la chhiar to em avangin hetiang zata lei duh tur leh lei thei tur hi chu an awm vak a rinawm lo hle a. United chuan an chhiar ang zat hi pawisa nei thei pawh ni se, inhliam ngun em em mai leina atan chuan heti zat hi an phawrh phal a rinawm lo a ni.

Welsh winger hian tun hnaiah game 341 khelh theihna hun neiin, inhliam vangin a inkhel tam thei lo thung a, vawi 228 chauh a inkhel a, vawi 29 ngawt mai a inhliam tawh a. Kum 29-a upa Bale hi a ngheta lei duh an awm vakin a rinawm lo hle.