Barcelona chuan Samuel Umtiti chu nipui transfer window inhawn hunah chhuahtir an duh a, a manah pawh £44 million vel an beisei thu an sawi.

La Liga champion Barcelona chuan transfer window inhawn hunah an squad chu siksawi nual an tum a, tlema player naupang deuh zawk lak thar an duh thu sawiin, an player neih sa thenkhat chu hralh chhuah an duh thu an sawi a ni.

Player neih sa hralh an tumna kawngah hian Samuel Umtiti chu hralh atana an sawi rik hmasak ber niin, duhtu an awm a nih phawt chuan Barcelona hian £44 million vela hralh an remtih tur thu an sawi chhuak.

Coronavirus darh mek vangin infiamna khawvel pawh an buai phah hle a, khawvel hmun hrang hrangah infiamna chi hran hran chu chhunzawm theih a ni lo a, an chawl thup mai a. Hetianga an chawlh lailawk avang hian club hnuaia thawktute leh player te hlawh pawh tihhniam a ngai hlawm dawn a. Barcelona player te pawhin an hlawh chu 70% zeta tihhniam an remti tawh a ni.

French defender Samuel Umtiti chuan 2016 ah khan Camp Nou a luhchilh a, 2018 ah khan contract thar ziakin, hetah hian release clause £443 million zet an dah tel a ni.

Tun hnaia boruak duhawm lo tak avangin sum dinhmun a tlahniam nasa a, Barcelona sum dinhmun pawh a tlahniam nasa hle a. Hetiang a nih avang hian Umtiti an hralh chhuak dawn a nih pawhin a hmaa a man an chhiar ang zat chuan hralh chi a ni dawn lo tih an hria a, an tihniam ta vak a ni.

Umtiti hi Barca-in hralh an remti dawn a nih chuan Premier League club Chelsea, Arsenal leh Manchester United te chuan an ngaihven a rinawm hle a. Anni hian a hma atang tawhin Umtiti hi an lo thlithlai tawh thin a, a man pawh tihhniam a nih phei chuan lak tumin an chet chhuah ngei a rinawm hle.

Tun season kal mekah Umtiti hi a inhliam thin avangin duh angin a inlan hnem thei lo a, vawi 11 chiah a la khel ve a. Kum 26-a upa centre-back hian Lyon lamah bul a tan a, 2018 khan France chu World Cup trophy a lakpui a ni.