Ni 24 atanga tan 3x3 Championship chu zirtawp zan (27.5.2016) khan zawh fel a ni ta. Basketball infiammi ten an hlut hle a, final zanah pawh hian mi thahnem tak he final en tur hian Zarkawt basketball court ah an pungkhawm a ni.
District Child Protection Unit, Aizawl chuan thalai naupang leh rawlthar te tan 3-on-3 Basketball Championship chu ni 24-27 chhung khan a buatsaih a. Hetah hian team 52 lai telin rookie (naupang) ah team 21 leh all-star (puitling) ah team 31 te an tel a ni. Naupang lamah hian Seling leh Lunglei lam atang pawhin an rawn chhim a, tin, puitling lamah Zawlnuam lam atangin an lo kal bawk. Team te hi knock out round a an inthlitfim hnuah league in an khel a, hetah hi chuan game pawh a zia chho hle. Vanneihthlak takin khaw chhe karah ruahsur hnuaiah tu man an khel lo a ni.
Rookie lam atangin final-ah 02 Ballerz (Lunglei) team te chuan 1LA(Khatla) team te chu 15-13 in minutes 10 chhungin an hneh a. Lunglei lam player ah Lalrinfela Pachuau (Mafela) Chu final MVP-ah a tlan a, final zanah hian point 10 zet a nei a. minute khat ah point khat zel nei ang a ni. Tin, game hmasa lamah pawh point 11 te hial lo nei thei a ni a, a partner Eddie pawh hian a thawh hlawk hle bawk.
All-star ah chuan Chicks-Magnet leh TBL te in tumin Chicks Magnet hian time a zawh hmain TBL hi 21-8 in an hneh. Game hi a rei lo a, minute 10 zel khelh niin, minute 10 chhunga point 21 hmu hman chu chaka puan an ni. All-star ah hian final MVP ah R-a chu thlan a ni a, anni team hian quarterfinals thleng khan point 27 theuh an nei. MVP atan tunge hriat a ni lo. Mahse final thleng an khelh takah chuan a thiam bik chu thlitfim a awmin point 13 lai an rawn nei ta a ni.
Hemi game ti hmuhnawm tur hian 3point shootout chu semifinal leh final inkarah neih a ni a, team tin atangin player 1 tel theih a ni. Team lo tla tawh tan pawn champion-na hun a rawn inhawng leh a. 3point shoot tur hian mi 23 lai in hming pein an in theh siak ta. First round ah Hmachhuana (MachineGun team) chuan point 15 lai a rawn score thei a, basketball rack 3 leh 4 phei chu hlah miah lovin a score vek a ni. A dawttu C-a chuan point 10 a rawn nei ve a.Mi dang zawngin point 4 ,6,8 te an nei tlangpui hlawm. Round 2 khelh tur a nih avangin a ti tha 6 te chuan champion nih tumin an in the siak leh a.
Mafaka (4Amigos team) chuan point 10 rawn thun theiin Hmachhuana'n point 7 a score chu final round ah a rawn khuma ta a, champion a rawn ni thei ta a ni.
District Child Protection Unit thawhna zarah hun hlimawm tak thalaiin an hman mai bakah naupang chunga hleilenna leh Dan kalh thei thil tih loh tur chi hrang hrang te an hriatzau phah hle a, hetiang ang hun hi kan kham lovin hun lo la kal zel tur atan paw'n infiammi ten chhunzawm zel atan tha an ti hle a ni.