Thawhtanni zanlai khan London-ah The Best FIFA Award semna hun neih a ni a, Argentina captain kum 36 mi Lionel Messi chu 2023 The Best FIFA Men’s Player atana thlan a ni.
FIFA The Best hi tuna a kalphung ang hian kum 2016 atang khan sem tan a ni a, Messi hian kum 2019 leh kum 2022-ah te khan a lo dawng tawh bawk a, Inter Miami forward hi The Best FIFA Men’s Player dawng ngun ber a ni.
2023 The Best FIFA Award atan hian kum 2022 December thla ni 19 atanga nikum August thla ni 20 thlenga player te chet dan en a ni a, 2023 The Best FIFA Men’s Player-ah hian Manchester City striker Erling Haaland chu pahnihna niin, PSG forward Kylian Mbappe chu pathumna a ni bawk.
Hmeichhe lamah nikum Ballon d’Or dawngtu Spain leh Barcelona player Aitana Bonmati chu The Best FIFA Women's Player 2023 thlan a ni ve thung.
The Best FIFA Men's Goalkeeper 2023 atan Brazil leh Manchester City goalkeeper Ederson thlan a ni a, The Best FIFA Women's Goalkeeper 2023 atan England leh Manchester United goalkeeper Mary Earps thlan a ni.
The Best FIFA Men's Coach of the Year 2023 chu Manchester City manager Pep Guardiola-a’n a dawng a, England hmeichhe team head coach Sarina Wiegman chuan The Best FIFA Women's Coach of the Year 2023 a dawng bawk.
2023 FIFA Puskas Award chu Brazilian Serie B Botafogo midfielder Guilherme Madruga-a’n a dawng a, Brazil Senior Men's National Team Player te chuan FIFA Fair Player award an dawng bawk a ni.
FIFA FIFPRO World XI thlan a ni a, a hnuaiah hian 2023 FIFA FIFPRO Men’s World XI leh 2023 FIFA FIFPRO Women’s World XI te tarlan a ni.
2023 FIFA FIFPRO Men's World XI
Goalkeeper: Thibaut Courtois.
Defenders: Kyle Walker, John Stones, Ruben Dias.
Midfielders: Bernardo Silva, Kevin De Bruyne, Jude Bellingham.
Forwards: Lionel Messi, Erling Haaland, Kylian Mbappe, Vinicius Junior.
2023 FIFA FIFPRO Women's World XI
Goalkeeper: Mary Earps
Defenders: Lucy Bronze, Alex Greenwood, Olga Carmona
Midfielders: Lauren James, Aitana Bonmati, Keira Walsh, Ella Toone, Alessia Russo
Forwards: Sam Kerr, Alex Morgan