Real Madrid chuan si hnih faia Borussia Dortmund hnehin, a vawi 15-nan Champions League no mawi an chawi.

Real Madrid tan Carvajal leh Vincius Jr. ten goal an khung a, Real Madrid hian inkhelh bul tan tha lo mah se, an khel tha tulh tulh a, hun tawp lamah phei chuan chance tam tak an nei a ni.

First half-ah Real Madrid-in ball chang hnem viau mah se, chance erawh an nei hleithei lo. Dortmund erawhin an nawr tlang fua fua.

Adeyemi chuan Courtois chiah a hmachhawn tawh tihin a pet goal lo. Fullkrug chuan Real Madrid goal post a pet per bawk. First half tawp dawnah Sabitzer chuan box pawn atangin kawh zetin a shot a, Courtois chuan tha takin a lo dan sak.

Second half tan a ni a, Real Madrid game a rawn danglam chho. Kroos-a free kick tha lutuk pahnih chu Kobel chuan a lo dan sak ve ve.

Minute 74-ah Real Madrid chuan goal an khung ta. Toni Kroos-a corner pet chu Carvajal chuan near post atangin a tauh goal.

Bellingham chuan goal hnihna a khung teuh hle, hnai set sawt atangin a chhuih a, a goal ngei dawn nia a lan laiin an lo dang.

Camavinga shot leh Nacho tauh chu tha zet zetin Kobel chuan a lo dang ve ve a, minute 83-ah Vincius Jr chuan goal hnihna a khung leh ta nge nge.

Maatsen chuan a back pass, mahse a tisual hlauh mai. Bellingham a pass a, English midfielder hian box veilam sira awm Vinicius Jr a pe, ani hian tihsual nei miah loin a pet goal ta a ni.

First half chauh en chuan Borussia Dortmund kha champion phu zawk kan ti thei ang. Chutih laiin second half-ah erawh nasa takin Real Madrid an hlauhawm a, BVB goalkeeper Kobel kan hmu mawlh mawlh ta a ni.

Toni Kroos chuan Champions League no mawi nen Real Madrid a chhuahsan ta a, Germany international hian UCL no mawi vawi 6 lai a chawi ta a ni.