Khawvela football thuneitu sang ber FIFA chuan kum 2022 World Cup, Qatar-a neih turah team 48 ni lovin, a pangngai anga team 32 tho an awm tur thu an puang.

Kum 2026 World Cup atangin team 48 an tel tawh dawn a, hei hi nikum khan FIFA president Gianni Infantino chuan kum 2022 World Cup atangin team 48 an tel maithei tih thu a lo sawi tawh a, mahse World Cup lo awm leh hmasa ber turah hian team 32 bawk an tel ang.

Sawi lan angin 2022 World Cup thlengtu tur hi Qatar an ni a, team 48 an tel dawn a nih chuan Qatar tan chiah thlen theih a ni dawn lova, chuvang chuan a thlengtu tur ram dang ngaihtuah leh a ngai dawn a, mahse tunah erawh buaina awm dawn ta lo.

Team 32 atanga team 48-a World Cup khel tur tih pun a nih chuan team 16 lai an awm belh dawn tihna a ni a, game pawh a tam belh hle dawn a, ram pakhat tan thlen zawh chi a ni tawh dawn lo.

Kum 2026 World Cup pawh hi ram pathumin an thleng dawn a, USA, Mexico leh Canada-ah khelh a ni ang. Khawpui 16-ah khelh kual a ni dawn a, ram pathumin an thlen vawi khatna a ni dawn.