Lalrinliana Hnamte leh Lalthathanga Khawlhring te khelhna, ATK Mohun Bagan chu 2022-23 Hero Indian Super League champion an ni ta.
Inrinni zan khan Fatorda Stadium-ah ATK Mohun Bagan leh Bengaluru FC te chuan final hmuhnawm tak an khel. Hun pangngaiah 2-2 in an inhnehtawk a.
Penalty shootout hmanga chak zawk zawn a ni a, hetah hian ATK Mohun Bagan chuan 4-3 in hnehna an chang a, a vawi khat nan ISL no mawi an chawi ta a ni.
Final-a inhmachhawn team hnihte hi table-a 3-na leh 4-na an ni a. Kerala Blasters an pet chhuah danah Bengaluru FC chuan dem hlawh viau mah se, league leader Mumbai FC an hneh leh a, final an lut ta kha a ni a.
Final-ah erawh ATK Mohun Bagan FC an ngam ta lo. Goal hmasa ber hi penalty atanga lut a ni a. Roy Krishna handball avangin Bagan chuan penalty an hlawhchhuak, he penalty hi Petratos chuan goal-ah a chantir.
First half tawp dawn tak takah Bengaluru FC lamin penalty an hlawhchhuak ve leh. Subhasish Bose chuan chiang set sawtin ball a pet thelh, Roy Krishna khupah chiang zetin a pet chhunzawm a, penalty ham a ni ta. He penalty hi Sunil Chhetri chuan goal-ah a chantir.
Team hnih te 1-1 in an inhnehtawk, second half minute 78-ah Bengaluru FC chuan corner an hlawhchhuak a, far post atangin Krishna chuan a tauh goal, 2-1 in Bengaluru FC chuan hma an hruai ta.
Bagan lam an beidawng lo, minute 85-ah penalty an hlawhchhuak leh. Pablo Perez chuan Kiyan Nassiri a ti tlu a, referee chuan penalty a ham leh. He penalty hi Dimitri Petratos chuan goal-ah a chantir leh a, 2-2 in hun pangngai a tawp.
Extra time khelh a ni a, goal chance hlauhawm tak tak awm mah se goal dang a luh belh lo. Penalty shootout hmanga chak zawk zawn a ni a, Bruno Ramires-a penalty chhuih chu Bagan keeper Kaith chuan a lo dan sak a, 4-3 in Bagan chu an chak ta a ni.
He match-ah hian Terina chuan second half tirah Martins a thlak, Bagan team a rawn ti khawng sawt a, a khel tha hle nghe nghe. Lalthathanga erawh he match-ah hian a inlan ve ta lo a ni.
Shield Winner Mumbai City FC forward Lallianzuala Chhangte chu ISL Best player atan thlan a ni a, tun season chhungin goal 10 a khung bakah assist vawi 6 a nei.
Indian zingah Sunil Chhetri dawta Best player lawmman dawng leh thei hmasa ber a ni a, pawisa fai cheng nuai 5 a dawng bawk. Hetih lai hian Indian National Team camp-ah Lza hi a awm avangin mimal lawmman hi a hmunah a dawng thei ta lo a ni.
Mizo zingah ISL mimal lawmman dawng 5 an awm ta a, Jeje Lalpekhlua (2015), Jerry Lalrinzuala (2016), Lalruatthara (2017) leh Lalengmawia Ralte (2020-21) te chuan Emerging player of the league lawmman an lo dawng tawh a. Lallianzuala Chhangte chuan tun season ISL Best player lawmman a dawng ta a ni.