Formula 1 intlansiakna hmun pakhat, Belgian Grand Prix nghahna Spa-Francorchamps circuit-ah 2021 thleng an la intlansiak zel dawn.

Kuminah Spa-Francorchamps contract chu a zo tawh dawn a, hei vang hian F1 thuneitute nen an indawr a, vawiin khan inremna an nei a, contract hi an pawt sei leh ta a. Heti a nih chuan helai hmunah hian a lo berah season thum chhung chu F1 intlansiak en tur a la awm leh dawn a ni.

F1 neitu Liberty Media chuan Europe khawmualpui laili deuha intlansiak chhunzawm zel chu an duh thu an sawi a, Spa-Francorchamps hi F1 tan chuan hmun pawimawh tak a nih thu an sawi tel.

Liberty Media chuan thuchhuah an siam a, “Spa-Francorchamps circuit hi Formula One intlansiaknaah chuan chanchin ngah ber pawl a nih bakah, ngainat hlawh ber pawl leh pawimawh berte zinga mi a ni a. 1950 khan helai hmunah hian F1 intlansiak hi nghah tan a ni,” tiin an tarlang.

An thuchhuahah chuan, “He infiamna hi khawvel hmun hrang hrangah a darh zau zel a, hei vang tak hian Spa pawimawhna pawh a zual zel a. Hmun thar zawng tel tho mah ila, a awm sa zingah hian ban theih loh tur chi hi an awm ve a ni,” tiin an tarlang bawk.

Formula One director of promoters and business relations Chloe Targett-Adams chuan, “Hetianga inremna kan nei thei hi lawmawm kan ti hle a, tunah chuan Formula One Belgian Grand Prix chu kum thum chhung a la chhunzawm theih dawn tihna a ni,” a ti a.

A sawi zelnaah, “Tun tuma kan inremna hi a hma ai chuan a changtlung lehzual tawh a, Formula One leh Spa Grand Prix te tan kan contract ziah hi a tha zawk thei ve ve a, he intlansiak entute tan pawh a hmuhnawm lehzual kan beisei,” a ti bawk.

2000 bawr vel khan he circuit hi vawi hnih chu an telh lo a, 2003 khan vaihlo fakna chungchang avangin Spa-ah hian an intlansiak lo a, 2006 khan an telh lo tawh bawk a. Walloon minister of economy Pierre Yves-Jeholet chuan tuna an inremna hian sumdawnna kawngah pawh kori a tu viau dawn niin a sawi.

Tuna Formula One circuit awm mek zingah Hockenheim leh Suzuka te chauh chuan 2019 atan contract an nei lo a. F1 hian kum tharah chuan Miami khawlaia intlansiak a nih theih nan theihtawpin hma an la mek a ni.