21 Nov 2020 03:26

inkhel

2020 Golden Boy atan Erling Braut Haaland an thlang

Erling Braut Haaland chuan a khelhpui Jadon Sancho a khum a, 2020 Golden Boy chawimawina a dawng.

Italy rama chanchinbu lar Tuttosport chuan Golden Boy award dawng tur hi an thlang thin a, he chawimawina hi 2003 atang khan an sem tan a, tun thlengin an la kalpui zel a ni.

Golden Boy award hi Europe khawmualpui league hrang hranga khel, rawlthar footballer kum 21 aia upa lo ho zinga tha ber hnenah an hlan thin a. A hma pawhin player lar tak takin an lo dawng tawh thin a, Lionel Messi (2005) leh Kylian Mbappe (2017) te pawh a dawng tawh zingah hian telin, a dawng hnuhnung ber chu Joao Felix (2019) a ni.

Europe khawmualpuia sport journalist ho chuan he chawimawina dawng tur hi an thlang chhuak thin a. Vote thlaktute hian player panga theuh an thlang chhuak a, an thlan chhuahte zinga vote hmu sang ber chu chawimawina hi an hlan thin a ni.

Borussia Dortmund forward Erling Braut Haaland hian 2019-20 season chhung khan inelna hrang hrangah goal 44 zet chu a thun a, heng zinga goal 28 te hi RB Salzburg tana a thun a ni a. Season laihawlah RB Salzburg atangin Dortmund a zawm a, heti chung hian kum 20 mi Haaland hian league game 18 khelhah goal 16 ngawt mai a thun thei tho a, Bundesliga club tana a game hmasa berah hattrick a siam nghe nghe a ni.

Norway striker Haaland hian Borussia Dortmund lama a khelhpui, nikuma pahnihna Jadon Sancho a khum mai bakah Barcelona rawlthar Ansu Fati bakah Manchester United forward Mason Greenwood te chu a khum bawk a ni.

He chawimawina dawng thei tura an chhawp chhuah zingah hian a chunga tar lante bakah Bayern Munich player Alphonso Davies leh Manchester City player Phil Foden te pawh an tel a ni.

Tun season chhungin Erling Braut Haaland hian inelna hrang hrangah game 11 a khel tawh a, hengah hian goal 11 chu a thun leh der tawh a. Bundesliga game 6 khelhah goal 6 a thun tawh a, UEFA Champions League game 3 khelhah goal 4 a thun der tawh bawk a ni.