09 Oct 2020 04:13

inkhel

2020 French Open mipa semi finalist te

Zaninah 2020 French Open mipa semi final an khel dawn a, rin kai ber Rafael Nadal chu Diego Schwartzman nen an inkhel ang a, Stefanos Tsitsipas chu Novak Djokovic nen an inkhel dawn bawk a ni.

Mi tam zawk chuan final-ah hian Rafael Nadal leh Novak Djokovic te an inkhelh ngei an ring a. Hetih lai hian Diego Schwartzman leh Stefanos Tsitsipas te chuan a vawi khatna atan Grand Slam final luh theih ngei an tum dawn a ni.

Stefanos Tsitsipas chuan 2019 Australian Open round of 16 ah khan Roger Federer a hneh a, hei vang hian thawm a nei lian hle a. Tun tum hi Grand Slam bikah chuan semi final a luh vawi hnihna a ni a. 2019 ATP Finals champion hian inelna lianah pawh a zahpuiawm lo a ni tih a lantir tawh a. Kum 22-a upa Tsitsipas hi World No. 6 a ni mek a, tun tumah hian a game hmasa berah set 5 an khel a, a bak chu set a la hloh leh miah lo a ni.

Novak Djokovic chuan Grand Slam title 17 a la tawh a, title 18 la tur hian Stefanos Tsitsipas a pal tlang a ngai dawn a. World No. 1 hian 2018 hnua Grand Slam inelna 10-a a telnaah vawi 5 a chak thei a. Tun tournament bikah pawh a che tha hle a, helai hmunah hian vawi khat a champion tawh bakah final pawh vawi thum chu a lo lut tawh a ni.

David Schwartzman chuan clay court-a tha ber mai a hmachhawn dawn a. Kum 28-a upa Argentine player hian final lut turin vawi 12 champion tawh Rafael Nadal a hneh theih a ngai dawn a. Schwartzman hi a chak thei a nih ngat chuan Roland Garros-a Nadal hneh thei pathumna a ni ang a. Thla hmasaah khan Rome khawpuia clay court-ah pawh Schwartzman hian Nadal hi straight set-in a lo hneh tawh a, hetiang hi thlentir leh ngei a tum dawn a. Grand Slam tournament bikah chuan tun tum hi semi final a luh hmasak ber a ni.

Rafael Nadal chuan Roger Federer tluk theih a tum mek a, Grand Slam title 20 lak theih a tum mek a, Roland Garros bikah hian vawi 13 chu a lo champion tawh a. Spaniard hi tun tumah pawh hian a che tha em em mai a, set a la hloh miah lo a. French Open bika match 100 a khelhah Nadal hi vawi 98 a chak thei a, vawi 2 chauh chak loh a la nei a. Tun tumah pawh champion tura rin kai ber a ni.