10 Oct 2020 05:40

inkhel

2020 French Open mipa final thlir kualna

Naktuk zanah tennis khawvela thil nghahhlelhawm tak mai chu hmuh tur a awm dawn a, World No. 1 ni mek leh vawi 12 ngawt Roland Garros-a champion tawh an inkhel ang.

2020 French Open mipa final chu a nep dawn lo chiang a, Novak Djokovic leh Rafael Nadal te chu an inkhel dawn a, chak zawk tur sawi chian pawh a harsa hle.

Semi final: Second seed Rafael Nadal chuan record thar siam a hnaih zel a, Roland Garros-ah title 13 a la thei tep tawh a, semi final-ah Argentine player Diego Schwartzman chu 6-3, 6-3, 7-6 (7-0) in a hneh a ni.

Lehlamah Novak Djokovic pawhin Grand Slam final luh ve hrim hrim tum, fifth seed kum 22-a upa Stefanos Tsitsipas chu 6-3, 6-2, 5-7, 4-6, 6-1 in a lo hneh ve bawk a ni.

Head-to-head: Novak Djokovic leh Rafael Nadal te hi a hmain vawi 55 an lo inhmachhawn tawh a, naktuka an inkhelh hunah vawi 56 an inhmachhawn tling chiah ang.

Anni tluka inhmachhawn hnem hi mipa zingah chuan an la awm lo a, Grand Slam final-ah pawh vawi 9 an intawnna tur a ni tawh bawk a. Grand Slam event bikah Nadal chuan Djokovic hi vawi 9 a hneh tawh a, Djokovic hi vawi 6 chu a chak ve tawh bawk a. Slam final-a vawi 8 an intawn tawhah vawi 4 ve ve an chak tawh a ni.

Grand Slam title: Rafael Nadal a chak a nih chuan Roger Federer-a record siam a nihrual thei dawn a. Nadal hian Grand Slam title 19 a la tawh a, Roland Garros-ah hian a chak a nih chuan title 20 a la ve thei chiah ang a, Roger Federer nen title an lak zat hi a inang thei dawn a ni.

Nadal hian French Open title hi 12 ngawt mai a la tawh a, record a siam chiang hle a, tun tuma a champion a nih phei chuan record hi a siam belhchhah ang a, vawi 13 a champion tling tawh ang.

Djokovic hi a chak zawk a nih chuan Grand Slam title 18 a la tling ve tawh ang a, Nadal aiin pakhatin a la hniam ang a, kum 39-a upa Federer aiin title 2 in a la hniam dawn bawk a ni.

Statistics: Rafael Nadal chu Roland Garros-a match 101 a khelhah vawi 99 a chak thei a. Naktuka Djokovic a hneh a nih chuan helai hmunah hian vawi 100 a chak tling thei chiah ang.

Kumin French Open bikah hian Nadal chuan set a la hloh miah lo a, Djokovic chu Roland Garros-a final a luh vawi 5-na a ni a. Open Era bikah Grand Slam tournament hrang hrangah vawi hnih theuh champion theuh thei hmasa ber nih a tum hle.

An inkhelh tur chungchangah Rafael Nadal chuan, “Final kan khelh turah hian thil pakhat chiah ka ngaihtuahnaah a awm a, Novak nena inkhel tur kan ni bawk a, theihtawp tak meuh ka chhuah a ngai tih ka hria. Ka theihna zawng zawng ka sawm khawm a nih loh chuan ka tan chak ngaihna a awm lo,” a ti.