08 Oct 2020 05:04

inkhel

2020 French Open: Hmeichhe semi finalist te

2020 French Open semi final an khel dawn tawh a, chanchin chiang tak a awm hma hian semi final thleng thei hmeichhe pali hi han bel chiang hlawm ila a tha awm e.

Grand Slam title vawi hnih la tawh Petra Kvitova chuan title lak belh ngei a tum hle a, a kawngah Sofia Kenin a ding a, pal tlang chu a awlsam hauh lo ang a. Lehlamah semi final la lut ngai lo pahnih Nadia Podoroska leh Iga Swiatek te chu an inhmachhawn dawn bawk a ni.

Nadia Podoroska hi qualifier zingah chuan semi final thleng thei hmasa ber a ni a. Kum 23-a upa Argentine tennis player chiah hi Open era-ah chuan qualifier zinga French Open hmeichhe semi final thleng thei a la ni a. Roland Garros-ah hian Elina Svitolina a hneh theih avangin mi hriat a hlawh tan a, Top 50 huangah a lut thei ngei dawn a ni.

Iga Swiatek hi kum 19-a upa chauh a la ni a, tennis khawvela a zuan luh hnua a a chet fuh ber tia sawi theih chu round of 16-ah 6-1, 6-2 a top seed Simona Halep a hneh thei kha a ni a. Tun thlengin set a la hloh zui miah lo nghe nghe a. 2018 ah khan French Open girls doubles champion pawh a lo ni ve tawh a. 2019 chhung khan WTA Tour lamah a khel hnem hle.

Petra Kvitova chuan tun tournament-ah hian champion ngei a tum viau dawn a. Kum 30-a upa Kvitova hi 2016 a chemtea an vih hnuah Grand Slam title la thei dinhmuna a din leh hmasak ber a ni a. Wimbledon title vawi hnih la tawh hi Australian Open quarter final-ah a tla a, US Open-ah khan fourth round bak a thleng ta lo bawk a ni.

Sofia Kenin chuan Grand Slam title lak leh theih ngei a tum hle a. Kum 21-a upa Kenin hi kumina Australian Open ah khan a champion a, Grand Slam title lak belh hi a tum lian ber a ni a. Roland Garros hma hian Kenin chu tournament-ah vawi hnih a inlan a, first round leh fourth round-ah te a tla a. Tun tumah hian fourth seed niin, la dam zingah chuan rank sang ber a ni.