Games khel thinte tan chuan 2019 chhungin chanchin sawi tur tam tak a awm a, a tlangpuiin a lawmawm lampang a ni a tih theih a. Chutih rualin kum thar lo thleng turah pawh hian games chi hrang hrang tlangzarh tur a awm nghal nual mai a, nghahhlelhawm tak tak pawh a awm hlawm a ni.
2020 hnu lamah chuan console chi thar a inlar nual tura ngaih niin, PS5, Xbox Series X leh Nintendo Switch edition te chu awm tawh tura beisei a ni hlawm a. Hei bakah hian Google Stadia leh Project xCloud te chuan cloud gaming khawvel chu an thlak danglam viau a rinawm bawk a ni.
Kum thara games chi hrang hrang tlangzarh tur zinga nghahhlelhawm zual nia ngaih thenkhat han tarlang ila.
Animal Crossing: New Horizons
Hei hi March 20, 2020 a tlangzarh tura ruahman niin, Nintendo Switch ah a awm dawn a. Animal Crossing game an tlangzarh hnuhnun ber chu kum 8 kaltaah khan a ni daih tawh a ni.
Marvel’s Avengers
Avengers ngainatute tan chuan he game hi a nghahhlelhawm tawh hle dawn a. A vawi khatna atan Avengers member zinga mi kan duh duh angin a khelh theih dawn a, Captain America, Iron Man, Thor, Black Widow leh Hulk ang tein a khelh theih ang.
He game hi May 15, 2020 a tlangzarh tura ruahman niin, PC, PS4, Xbox One leh Stadia ah te khelh theih a ni ang.
Halo Infinite
Kum 5 kaltaa an tlangzarh Halo game hnuhnung ber chhunzawmtu tur Halo Infinite hi 2020 a tlangzarh tura ruahman niin, PC, Xbox One, Xbox Series X ah te khelh theih a ni dawn a. Hetah hian Master Chief chu a langsar ber pawl a ni ang.
DOOM Eternal
March 20, 2020 ah he game hi tlangzarh tura beisei a ni a, PC, PS4, Xbox One leh Stadia ah te khelh theih a ni dawn a. 2016 ah khan DOOM chu an lo tlangzarh tawh a, hemi chhunzawmtu atan hian DOOM Eternal hi an siam leh chiah a. Hmanraw thar chi hrang hrang te a awm dawn bakah hmelma pawh chi hrang hrang an awm thar dawn bawk a ni.
The Last of Us Part II
He game hi May 29, 2020 a tlangzarh tura beisei a ni a, PS4 ah khelh theihin a awm dawn a. Joel leh Ellie te chu an inlan leh ang a, a hmaa mi, kum 5 kaltaa an siam khan award pawh a dawng nual a, tuna mi pawh hian a dawn leh ngei an beisei hle.
Cyberpunk 2077
April 16, 2020 a tlangzarh tura ruahman Cyberpunk 2077 hi game chhuak thar turah chuan nghahhlelh hlawh ber a tih theih a. He game hi Witcher 3: Wild Hunt siamtute siam tho niin, gamer te chuan beiseina sang tak nen an thlir mek a ni.