2020 atangin F1 Vietnamese GP a awm dawn

07th November 2018, 10:11PM

2020 atangin a vawi khatna atan Vietnam chuan Formula 1 intlansiak an thleng ve dawn a, Hanoi khuaa intlansiak turin inremna an siam fel vek tawh a ni.

Liberty Media in £6 billion a Formula One an lei hnuah Vietnamese Grand Prix hi calendar-a an telh thar hmasak ber a ni a. F1 chairman leh chief executive Chase Carey chuan khawvel ram hrang hranga he infiamna tihlar zelna atana pawimawh tak pakhat chu khawlaia intlansiak hi a nih thu a sawi a. Mipuiin hun rei zawk F1 an hlut phahna tur a nih thu a sawi tel bawk.

Chase Carey chuan, “Hanoi hian Formula 1 Grand Prix an thleng dawn a ni tih hi lawm takin kan puang a. 2017 atanga he infiamnaa kan tel atangin hma a sawn zel theih dan tur kan ngaihtuah nasa hle a. Formula 1 a lo darh zau zawk theihna turin intlansiakna hmun pawh tih belh zel kan duh a, chutiang atan chuan a hmasa ber atan Vietnamese Grand Prix hi kan hmang dawn a ni,” a ti.

“Khawvel pumpuia khaw lar leh nuam tak mai Hanoi a kan intlansiak tur hi phurawm kan ti em em a, nakin zelah pawh a lar chho viau tura ngaih a ni a. Helai hmun hi Formula 1 Grand Prix nghahna atana duhthusam a ni a, F1 calendar-ah chuan a lar pawl a nih ngei ka ring tlat a ni,” a ti bawk.

Vietnamese Grand Prix an neihna tur track hi 5.565 km a tui a ni a, Formula 1 huanga khawlaia intlansiakna palina niin, khawlaia intlansiaknaah phei chuan tlan chak theihna ber ni tura ngaih a ni a, kawng ngil thui deuh lai hmun thumah a awm a, a thui ber phei chu 1.5 km vel bawr a ni a, hetah hian car te chu 208 mph vela tlan thei tura beisei a ni.

An intlansiakna kawng hi kawi 22 awmna a ni dawn a, a kawi hmasa ber hi Germany a Nurburgring entawn deuha duan niin, kawi 12 atanga kawi 15 chu Monaco khawpuia intlansiakna entawna an siam a ni thung.

A hmain Indian Grand Prix an chhunzawm lo a, 2017 khan Malaysian Grand Prix an titawp leh a, Asia khawmualpuiah chuan Vietnam bakah hian Singapore, China leh Japan ramah te an la intlansiak dawn a ni.

Copyright © inkhel.com 2024. All rights reserved.