Dana White chuan 2020 chhungin lightweight championship title inchuhin Khabib Nurmagomedov leh Conor McGregor te chu an insual leh thei niin a sawi.

Conor McGregor (21-4) chu kum thar January thlaa UFC 246 ah Donald ‘Cowboy’ Cerrone (36-13) nen Las Vegas khawpuia insual tura ruahman niin, April thlaah khian Brooklyn khawpuiah Khabib Nurmagomedov chuan Tony Ferguson lakah a title humhim a tum dawn bawk a ni.

UFC president Dana White chuan McGregor chungchang sawiin, 155 pound ni loin 170 pound welterweight a tel a dil thu a sawi a. Hetianga a dil chhan pawh April 18 ah Tony Ferguson lakah eng pawh thleng se lo inrin lawk a duh vang niin a sawi a ni.

White chuan, “Conor chuan kuminah khan vawi thum insual hman kha a duh a. Cowboy a hneh thei a nih chuan Khabib nen an insual leh theih a beisei hle a, a duh ang diak diak hian thil erawh a kal thei dawn lo,” a ti.

“Hetih rual hian Conor chu in hre chiang vek a, a duh tawh vek vek hi chu a nawr tut tut tawh thin a. Tunah pawh Cowboy nen insual a remti a, a hneh thei a nih chuan pound 155 ah Khabib sualpui zui a duh nghal a ni,” a ti bawk.

A sawi zelnaah, “Nikum October thlaa thil thleng kha kan la hre vek a, Conor leh Khabib inkar boruak hi a la sosang viau bawk a. Conor hian Cowboy hi a hneh thei a nih chuan Khabib nen hian inhmachhawn thei dinhmunah chuan an ding ve thei tlat a ni,” a ti.

January thlaah McGregor hian Cerrone chu a hneh ta lo a nih pawhin welterweight fighter Jorge Masvidal chu a hmachhawn leh thei dawn niin Dana White chuan a sawi tel a ni.

“Conor McGregor hi chuan tu pawh hi a hmachhawn hreh lo vek mai a, hei tak hi a that ve na leh mi pawhin an lawm chhan a tih theih a ni,” tiin Dana White chuan a sawi.