22 Nov 2019 03:09

bakteaJr.

Mizo tlangval

​2020-ah ka lo kir dawn: Mayweather

Weight-class hrang hrang pangaa world champion lo ni tawh American boxer Floyd Mayweather chuan boxing chawlhsan tawh mahse kum 2020 hian a lo kir dawn tih a sawi.

Mayeather hian kum 2015 khan boxing a chawlhsana, mahse kum 2017 khan UFC fighter Conor Mcgregor hnek tura lo kirin, Mcgregor a hneh hnuah nikum kum tawp khan exhibition match-ah Japanese kickboxer Tenshin Nasukawa a hneh leha, hei hi a inhnek hnuhnun ber a ni.

Mayweather hi a lo kir leh dawn leh kir dawn loh chungchangah thawm a nei renga, mahse tun kar khan social media lamah nakkum 2020-a a lo kir tur thu a sawi a ngaihven a hlawh nghal hle.

Kum 42 mi Mayweather hi ani aia boxer ropui hi an awm bik chuang lo tluk a ni a, a che vel hrim hrim hi chanchinthar a ni nghal zel tih theih khawpa huhang ngah niin, nakkuma a lo kir tur a sawi pawh hian combat sports khawvela a dengchhuak nghal a tih loh theih loh.

2020-a a lo kir tur thu a sawi hma lawk hian Mayweather chuan video dah chhuakin UFC president Dana White nen an inbiak thu a sawi a, hemi hnu lawk hian a lo kir tur thu a sawi a,  boxing lamah ni lovin UFC lamah a lut mai dawn niin a lang.

A video dahchhuahah Mayweather chuan, “Dana White nen kum 2020-ah khawvel dengchhuak tur thil ropui tak ti leh turin hma kan la mek,” a ti. Hemi hnu lawk hian Mayweather chuan social media-ah a thlalak dah chhuakin, “2020-ah retirement atangin ka rawn chhuak dawn,” tih a ziak leh bawk.