2019-20 Premier League season an khel chauha, 2020-21 season tan nan kar ruk pawh a awm tawh lo dera, kumin zawng coronavirus-in engkim a chawk buai hneh hle a, kum dang nen thil a inang thei lo.
Premier League season thar hi thla thar September ni 12 hian tan a ni dawna, Inrinni a ni. Premier League season thar lo awm tur hi Premier League season 29-na a ni dawna, dan pangngaiah chuan August ni 8-a tan tur hi ni mahse sawi tawh angin, coronavirus in engkim a ti khailaka, season thar tan hun pawh hi sawn loh theih a ni lo.
Premier League club zinga Champions League emaw Europa League emaw khelh tur la nei an awm nuala, Manchester City leh Chelsea te chuan Champions League khelh tur an la nei a, Manchester United leh Wolves te chuan Europa League khelh tur an la nei bawk.
2019-20 season kha thla hmasa ni 26 khan a zo a, heta tanga chhiar hian season thar tan nan kar ruk a awma, mahse Europe-a la inlan tur te erawh season an tan tlai deuh tura ngaih a ni. An European game hnuhnung bera zirin an season tan hun tur bituk sak an ni dawna, ni 30 tal a tlem berah chawlh an nei ang.
Season thar lo awm tur hi ruahman dan chuan nakkum 2021 May thla ni 23-a khelh zawh tur a ni a, Euro tan nan ni 19 chiah a awm dawn tihna a ni.
Season tharah hmel thar pathum kan hmu dawna, Leeds United leh West Brom bakah Brentford emaw Fulham emaw kan hmu dawna, Norwich City, Watford leh Bournemouth te erawh kan hmu tawh dawn rih lo.
Season thar tir lamah entu mipui an la awm dawn rih lova, mahse October thla chho atang chuan stadium chhungah mipui an awm phal a nih a rinawm viaua, mahse mipui awm thei zat bithliah a nih a rinawm.
Season tharah hian lockdown hnua an kal dan angin duh chuan substitution panga a siam theih dawna, mahse hei erawh league thu thu a ni a, Premier League hian he dan hi an hmang zel dawn em a hriat rih lo.
Video Assistant Referees (VAR) hman a ni zel dawna, season tharah hian player dang te hmaah a ni emaw, official-te hmaah a ni emaw, player a khuh luih chuan red card pek theih a ni tawh dawn.
Season thar atan inbuatsaihna hun a inhawng meka, Premier League club te tan thla hmasa ni 27 atang khan transfer window inhawng tanin, October ni 5-ah khar a ni ang.