Milwaukee Bucks star forward Giannis Antetokounmpo chu 2018-19 NBA regular season Most Valuable Player atan an thlang.
Giannis Antetokounmpo hian Thawhtanni khan Santa Monica, California-ah chawimawina hi a dawng a, NBA Awards hun an hmanah hian Greece player hi lawm avangin a tap a. 2011 kuma MVP Derrick Rose hnua naupang ber niin, kum 40 chhungin MVP ni thei zingah naupan lama pathumna a ni.
Kum 24-a upa Giannis Antetokounmpo hian he chawimawina sang dawng tur hian 2018 MVP, Houston Rockets star James Harden leh Oklahoma City Thunder forward Paul George te chu a khum a ni.
Antetokounmpo hian Milwaukee Bucks-ah season 6 a hmang chiah a, tun season-ah khan a average chu game tinah 27.7 points niin 12.5 rebounds a ni bawk a. Milwaukee chu vawi 60 a chakpui a, vawi 22 an tlawm bawk a, Bucks hian regular season an hman that ber tum a la ni a. Eastern Conference finals an thleng thei a, hetah hian champion zui ta Toronto Raptors an hneh thei ta lo a ni.
Giannis Antetokounmpo chuan, “Ka teammate zawng zawngte chungah lawmthu ka sawi mawlh mawlh a. Game 60 ngawt mai chak theih hi mi pakhat chauh thil tih a ni lo chiang a, kan team tanrualna rah a ni. Locker room chhunga ka luh apiang hian ka teammate te chuan indona hmachhawn an inpeih a ni tih ka hmu ziah a, indona hmuna ka bula awm turin an inralring reng thin,” a ti.
An club inkaihhruaina chu a fak hle a, kum 18 mi chauh a nih laia Greece rama an lo ring ngam kha lawmawm a tih thu sawiin, Coach of the Year atana an thlan, head coach Mike Budenholzer kaihhruai coaching staff zawng zawng chungah lawmthu a sawi bawk.
Antetokounmpo chuan 2017 a chatuan ram pan tawh, a pa chu hnuk ulh teuhin lawmthu a hrilh a, tawng chhuah harsa khawpin a lungchhia a, “Inkhel tura ka pen chhuah apiangin ka pa hi ka rilruah a lang thar ziah thin,” tiin a sawi.
Giannis Antetokounmpo hi Milwaukee Bucks player zingah chuan 1974 hnua MVP ni leh thei hmasa ber niin, an player ropui Kareem Abdul-Jabbar kha vawi thum ngawt MVP atan an lo thlang tawh a ni.
America ram pawn lam mi MVP ni thei zingah Giannis Antetokounmpo hi telin, a hmain Hakeen Olajuwon (Nigeria), Tim Duncan (US Virgin Islands), Steve Nash (Canada) leh Dirk Nowitzki (Germany) te chu an lo thlang tawh bawk a ni.
Slovenian player Luca Doncic chu Rookie of the Year atan an thlang a. Dallas Mavericks tana thawh hlawk em em, kum 20-a upa Doncic hian Jason Kidd hnung a zui ve ta a ni.
Toronto player, Cameroon mi Pascal Siakam chu Most Improved Player atan an thlang a. Kum 25-a upa Siakam hian D’Angelo Russell leh De’Aaron Fox te chu he chawimawina dawng tur hian a khum a ni.
Los Angeles Clippers player Lou Williams chuan Sixth Man of the Year chawimawina a dawng a, he chawimawina hi a zawnin kum hnih a dawn tawh bakah a pumpuiah vawi thum a dawnna a ni a. 2015 ah khan Toronto Raptors-ah a lo dawng tawh bawk a ni.
Defensive Player of the Year chawimawina chu Utah French center Rudi Gobert chuan a dawng a. ‘Stifle Tower’ hian he chawimawina hi a zawnin season hnih a dawng ta a, Giannis Antetokounmpo leh Paul George te chu a khum a ni.
Player ropui pahnih Larry Bird leh Magic Johnson te hnenah Lifetime Achievement Award an hlan bawk a ni.