02 Dec 2019 01:26

inkhel

2019 Ballon d’Or dawngtu tur a put ru

Zanina Ballon d’Or dawngtu tur leh an point hmuh dan nia sawi chu a put ru a, heta a lan danah chuan Lionel Messi chu chawimawina dawngtu tur a ni.

Paris khawpuiah zanin hian Ballon d’Or dawngtu chu an puang dawn a, he chawimawina dawng thei tur hian mipa 30 leh hmeichhia 20 te chu khawvel hmun hrang hranga journalist rual 180 zette chuan an chhawp hrang a ni.

Journalist te’n chawimawina dawng tur an thlan hi mi hmuh theih lohin an dah hrang thin a, lawmman semna hun bik an buatsaihah chiah an puangzar thin a. Kuminah erawh thlalak pakhat chu social media lamah a darh chiam mai a, kumina chawimawina sang dawngtu tur mai bakah point hmu sang zualte leh an point hmuhte chu a intlar duat mai a ni.

Thlalak darh chiama a lan dan chuan Lionel Messi chu kumina Ballon d’Or dawngtu tur a ni a. Barcelona captain hi list-ah chuan a chungnung ber niin, point 446 a hmu a, amah hnaih bertu hi Liverpool defender Virgil van Dijk niin, Dutch defender hian point 382 a hmu a ni.

Liverpool striker Mohamed Salah chu pathumnaah a awm a, point 179 a hmu a. Messi anga vawi nga ngawt he chawimawina lo dawng tawh, Juventus forward Cristiano Ronaldo chu palinaah a awm a, point 133 a hmu a ni.

Panganaah hian Sadio Mane chu awmin, point 97 a hmu a. Alisson Becker chuan point 82 a hmu a, paruknaah a awm a. Pasarihnaah hian point 55 hmutu Kylian Mbappe a awm bawk a. Frenkie de Jong chu 8-naah a awm a, point 30 a hmu a. Pakuanaah Matthijs de Ligt chu awmin, point 29 a hmu a. Eden Hazard chuan point 21 a hmu a, Top 10 ah hian a lang chiah a ni.

He thlalak darh hi a tak tak a nih leh nih loh chu zanin velah a chiang tawh mai dawn a ni.