02 Feb 2018 03:14

Serchhip Chelsea

2018 Premier League thlasik bazar bihchianna

Thlasik transfer bazar hun liamta in huhang ala neizui zel a, tun tum thlasik transfer bazar hun inhawngah khan țum dang ang lo takin chanchin liantham a thleng nual a; hetiang hi thlasik transfer bazar bikah chuan a thleng khat hle.

Deloitte-in an tarlan dan chuan tun thlasik transfer bazarah khan Premier League club-te'n £430m zet an hmangral a, Arsenal, Brighton, Huddersfield, Liverpool, Manchester City, Southampton leh Swansea-te'n an club chanchina player manto ber lakluhna hun atan an hmang bawk.

SUM AN HMANG HNEM

Premier League club-te hian bazar tawp ni (deadline day)-ah ringawt khan £150m an seng niin Deloitte Sports Business Group chuan an tarlang a, hei hi Premier League thlasik football bazar huna sum an hman hnem ber țum a ni.

Premier League thlasik bazar tawp nia sum an hman hnem ber țum ni reng țhin chu kum 2011 thlasik lai kha a ni a, hemi țum hian £135m an sengral.

Tun thlasik bazar hunah khan a pumpuiin Premier League club-te'n £430m an sengral tih Deloitte hian an tarlang a, kum 2011 January thlaa an lo hmanral tawh £205m chu an khum chiang hle a kumin hi thlasik bazar huna sum an hmanral hnem ber țum a ni tel.

TUTE'N NGE SUM HMANG HNEM BER?

Club mal ang chuan Liverpool-in an hmang hnem bera player pahnih lakluh nan £75.2m an sengral a, The Reds hian Southampton defender Virgil van Dijk lei nan £75m an seng a Falkirk left-back Tony Gallacher lei nan £200,000 an hmang bawk.

Liverpool dawt chiaha sum hmang hnem chu Arsenal niin £61.8m an seng a player pahnih an lei. Gunners hian £60m sengin Borussia Dortmund forward Pierre-Emerick Aubameyang an lei a; PAS Giannina defender Konstantinos Mavropanos lakluh nan £1.8m an seng thung.

Alexis Sanchez leh Riyad Mahrez-te lakluh tuma hlawhtling ta lo Manchester City pawhin sum an seng tlem lo va player pahnih tho lakluh nan £61m an hmangral.

City hian an club chanchina player manto ber ni turin Athletic Bilbao defender Aymeric Laporte chu £57m-in an lei ngam a, New York City midfielder Jack Harrison man atan £4m an seng tel bawk.

Liverpool, Arsenal leh Manchester City-te bakah hian Chelsea (£57.6m), Everton (£47m), Leicester City (£26.4m) leh Tottenham (£25m)-te pawhin player thar lakluh nan sum an seng ve nual.

Premier League club tam zawkin player lei nan sum seng mahse Bournemouth, Burnley, Manchester United, Newcastle United leh West Ham-te erawh chuan sum sengin player thar an lalut ve lo thung a, Manchester United hian Arsenal ațangin Alexis Sanchez lalut mahse sum an seng lo va Gunners nen hian player an inthleng tawn.

SUM HMUHLET PAWH AN NEI THO

Sum senral a tam rual hian sum lalut lo bik an ni lo va, tun Premier League thlasik transfer bazar-ah khan player hralhna ațanga sum lalut hnem ber pawh sum hmang hnem ber Liverpool tho an ni.

Jurgen Klopp enkawlna hnuaia awm mek hian Philippe Coutinho an hralhna man ațangin £146.2m an hmu a, Oxford United hnenah Cameron Brannagan chhuahtir bawkin heta țang hian £200,000 an lalut bawk.

Southampton pawhin player hralhna ațanga sum lalut hnemah pahnihna dinhmun an hauh pha a, Dutch defender Van Dijk an hralhna ațangin £75m an hmu thei a; Chelsea pawhin player hralhna ațangin £57m an hmuchhuak ve bawk.

Chelsea-in sum an hmuhna hi Diego Costa a ni a, Spain striker hian nikum lam khan Atletico Madrid zawm tawh mahse January ni khat ațangin an transfer hi chhiar țan a ni.

Arsenal pawhin Theo Walcott, Olivier Giroud leh Francis Coquelin-te an chhuatirna ațangin £50m an hui thei a, West Ham pawhin Andre Ayew leh Diafra Sakho-te an hralhna ațangin £26m an hmuchhuak ve bawk.

PLAYER THAR AN NEI VEK LO

Premier League club-te hian tun thlasik transfer hun chhung khan player lakluh 48 an nei a, Watford leh Stoke City-in player thar pali neiin tun thlasik transfer bazara player thar lalut hnem ber an ni.

Newcastle, Chelsea, West Brom, Arsenal, Brighton, Swansea, Leicester leh Everton-te pawhin mithar pathum țheuh an nei bawk a, Liverpool, West Ham, Burnley, Manchester United, Crystal Palace, Huddersfield leh Manchester City-te pawhin player thar pahnih țheuh an neihbelh ve bawk.

Club țhenkhatin mithar an neih nual lai hian Southampton leh Tottenham chuan player pakhat ve ve chiah an lalut a, Bournemouth pheichuan player pakhat mah lalut lovin bazar hun liamta kha an hmang tluan thung a ni.