MMA (Mixed Martial Arts) World Championship 2017 opening ceremony chu hlawhtling takin Manama, Bahrain-ah November ni 12 khan Bahrain lal fapa Shaikh Nasser (Olympic Committee leh Sport & Youth President) chuan a hawng. Ram 52 atangin fighter 250 chuang an tel a ni. India ram aiawhin fighter 11 an kal ve.

Opening ceremony zawhah hian MyNextMatch (free sports management software specialising in combat sport) siamtute nen tang kawpin bout tie draw neih nghal a ni a, MISMA (Mizoram State MMA Association) fighter PMS Dawngliana, Kawrtethawveng/ Mission vengthlang; Fly weight (-57kg) category-a khel tur chuan vanneihthlak takin first round-ah bye a hmu hlauh mai a, Ireland leh Tajikistan intum tura chak zawk zawk a hmachhawn ve ang.

PMS-a bakah hian MISMA lam atangin Tv. Samuel Lalrozama Hmar, Dawrpui chu khawvel ram hrang hrang 11 atanga referee & judge tur mi 22 an thlan chhuah zingah a tel ve vangin official turin a kal ve a; MISMA president Pu Lalthakima, Mission Vengthlang chu India team manager tura ruat a nih angin a kal ve bawk.

Opening ceremony-ah IMMAF president Kerrith Brown chuan MMA hi khawvela game thang chak berte zing ami a nih vangin hma pawh nasa takin an lak zel thu a sawi a. UFC nena thawk dun an nih angin amateur fighter te tan IMMAF kal tlanga UFC a luh theihna chance tha tak a awm thu a dawi bakah Summer Olympics 2028 chu USA-a nghah tum a nih angin he game hi US sawrkar nen tang kawpa Olympic game ni tura nawr an tum thu a sawi bawk.