Real Madrid chuan 2016/17 La Liga match hnuhnung berah si hnih faiin Malaga an hneh a, pahnihna Barcelona lakah point thumin an fal a, La Liga champion an ni ta a ni.
Jose Mourinho-a'n league title a lakpui atanga kum 5 hnuah Real Madrid chuan a vawi khat nan league title an la leh ta a. Malaga an hneh tum hian Ronaldo chuan tan atanga minite hnihna lekah Isco through ball tha tak umin Malaga goalkeeper Kameni a bum hnuah goal hmahruai a khung.
Second half 55 mins-ah Benzema chuan Real Madrid goal hnihna a khung leh a, Kroos corner pet tha zet chu Ramos chuan hnai set sawt atangin a shot a, hei hi Malaga goalkeeper chuan lo dangin, hemi per kual hi Benzema chuan goal-ah a chhuih lut leh a ni. Goal dang a lut lova, si hnih faiin Real Madrid chuan hnehna an chang ta a ni.
Barcelona lakah point thumin hma an hruai a, Malaga lakah hian Real hian point khat an hlawhchhuah chuan an champion thei, point khat mai ni lovin point thum an hlawhchhuak ta a. Khelh 38 atangin Real hian 93 points an hlawhchhuak a, Barcelona chuan 90 points an hlawhchuak a ni.
Tun season La Liga match tinah Real Madrid hian goal an khung vek a. Zidane chuan season tir atanga Real Madrid a enkawl vawi khatnaah league title a lakpui nghal bakah Champions League final a thlenpui bawk a ni. Real Madrid hian La Liga title vawi 33 lai an la ta bawk a ni.
Champions League final Cardiff-a khelh turah hian Real Madrid hian hnehna an chang a nih ngat chuan title humhim thei hmasa ber an ni thei dawn a ni. Ronaldo chu Real Madrid player zinga langsar ber a ni leh a, Real Madrid tana a game hnuhnung 9-ah Ronaldo hian goal 14 lai a khung a ni.
Tun season La Liga-a Real Madrid tana goal khung hnem ber chu Ronaldo niin, goal 25 a khung a, goal 15 khungtu Morata chuan dawtin, Benzema chuan goal 11 a khung a, Isco chuan goal 10 a khung bawk a ni.
Thla 12 chhungin Ronaldo hian trophy lian 6 lai a la a, Champions League, Fifa Best Player, Ballon d'Or, Euro leh La Liga te niin, Champions League no mawi chawi tumin Cardiff lamah an fehchhuak leh dawn a ni.
Barcelona chuan an match hnuhnung berah 4-2 in Eibar an hneh a, hnehna chang mahse champion turin a tawk zo ta lo a ni. Inui chuan mikhual tan goal hnih a khung a, Barca hian si hnih an phur, Juanca chuan an lamah a ti goal hlauh a, Barca chuan goal khat an nei ve ta. Suarez chuan Barca si phurh a rul a, Barca hian penalty hlawhchhuak chhunzawmin, hei hi Messi chuan a thelh hlauh mai.
75 mins-ah Messi chuan penalty atangin goal a khung ta nge nge a, hun tawp dawn tak takah Messi chuan a goal hnihna ropui taka khungin, 4-2 in a team te a chakpui ta a ni.
Tun season-ah Messi chuan goal 53 a khung hem mai. La Liga top scorer niin, goal 37 a khung a, Europe league hrang hranga goal khung hnem ber a ni a, European golden boot a vawi 5 nan a dawng dawn a ni.