2016 Rio Olympic Hockey ah Mizo nula

06th January 2016, 03:01PM

January 5 chawhma dar 11 khan Hockey Mizoram chuan India team-a awm tur an player pahnih - Lalhunmawii d/o F.Rinkima, Champhai leh Lalhlunmawii d/o Pahlira, Neihloh khuate thlahna hun Hmingdailova Khiangte Parliamentary Secretary Office-ah an hmang.

Hlunmawii hi Bengaluru, (Bangalore )-a India Womens Hockey senior team coaching camp zawm tur a ni a, Rio Olympic 2016-a India aiawh turin an hrual ang a, thlan a nih chuan 2016 Olympic-ah India aiawha Mizo nula inkhel kan hmu dawn a ni.

Hunmawii hi junior player a ni ve thung a, India Junior Team a zawm ang a, tun thla chhungin ram hrang hrangah Hockey Tour neiin an zin chhuak ang.

Thlahna hun kaihruaitu Hockey Mizoram Sr.Vice President Zothankimi chuan India ramah Hockey India chu Hockey discipline enkawl tura Sawrkar leh Indian Olympic hruaitu ten an pawm tak avangin Mizoramah pawh Hmeichhia leh mipa a hranga awm tawh lovin kan inchhungkhawm ta a, kum 2012 khan Hockey Mizoram din tan ni tawh mahse mumal taka kalpui a ni thei lova, tun hnaiah inthlang thain mumal takin kan kal tan ta a ni a ti.

Hockey Mizoram hruaitu Zothankimi chuan " 2016 Rio Olympic Games-ah Mizo hmel hmuh ngei kan inbeisei a, he ram mipui leh sawrkar beiseina tihlawhtling tur hian theihtawp kan chhuah mek zel a ni. Sawrkarin a tih tur a ti tawh a, Association hruaituten kan theihna sang ber ka ti tawh bawk a, tunah chuan player-te kutah engkim a innghat tawh a ni" tiin India camp an zawmnaah Mizoram aiawhtu an nih zia hre renga Mizo mipui beiseina tihlawhtling ngei turin a fuih bawk.

He huna thusawitu dang Lalruatkimi, Jt.Secretary, Hockey Mizoram chuan, " Hlunmawii bakah Mizo player pahnih Ramngaihzuali, Lunglei Electric Veng leh Lalruatfeli, Lungleng (Lunglei district) te chu India team zawm tura koh an ni a, Hlunmawii phei chu Maharashtra captain ni pha hial a ni. Kan vanduai a nih loh chuan Rio Olympic-ah Mizo nula kan hmu ngei ang" a ti ve bawk.

India training camp zawm tur Mizoram player pahnihte hian nimin khan Aizawl chhuahsain Silchar an pan a, Silchar atang hian thlawhnain an training-na hmun tur an pan leh ang.

Nimin Jan.5 a\ang khan Nagaon, Assam-ah Hockey India 6th Junior Hockey Championship 2016 chu khelh tan a ni a, Mizoram hockey team pawh an tel a. Jan.13 thleng awh tur he Girls Championship-ah hian Mizoram chu pool B-ah Hockey Rajasthan, Hockey Gujarat, Assam Hockey leh Goans Hockey te nen awm tlangin nimin tlai khan an match hmasa berah Goa an hmachhawn a, chanchin buatsaih lai hian result kan hre hman ta lo a ni.

Copyright © inkhel.com 2024. All rights reserved.