Real Madrid forward Cristiano Ronaldo chu 2016 Europe best player-a thlan a ni a, Atletico Madrid foward Griezmann leh Real Madrid-a a khelhpui Gareth Bale-te khumin Ronaldo chuan he award hlu tak hi a dawng ta a ni.

2015/16 season chhunga Europe ram chhunga player che tha ber thlanchhuahnaah hian final short list pathum neih a ni a, hetah hian Cristiano Ronaldo, Griezmann leh Gareth Bale-te chu final shortlist niin, Monaco-a 2016/17 Champions League Group Stage draw neihnaah Ronaldo chu 2016 Europe Best Player award hlan a ni ta a ni.

Ronaldo hian Real Madrid chu 2015/16 Champions League title a lakpui bakah Euro 2016-ah a ram Portugal a champion pui bawk a, Europe Best player mai bakah 2016 Ballon d'Or dawng tura rinkai ber a ni bawk a ni.

Season liamta khan Real Madrid tan Ronaldo hian Game 47 atangin goal 51 lai a khung tling a, assists vawi 15 lai a nei tling bawk. Champions League-ah a che ropui hle a, UCL goal khung hnem ber ni lai niin, goal 93 lai a nei tawh a, amah hnaih ber tu chu Barcelona forward Lionel Messi a ni a, goal 83 a khung tawh a ni.

Season liamta khan Ronaldo hian Champions League game 11 atangin goal 16 lai a khung hem mai, assists pawh vawi 4 a nei tling bawk a ni. Europe Best player lo ni tawh te : Lionel Messi (2011, 2015), Andrés Iniesta (2012), Franck Ribéry (2013) and Ronaldo (2014).

Hmeichhe lamah 2016 Europe-a player tha ber chu Lyon striker Norwegian footballer kum 21 mi Ada Martine Stolsmo Hegerberg a ni.