Zanin dar 10 atang hian Paris-ah 2016 Ballon d'Or winner puanna function tan a ni dawn. Winner puan a nih hmain France Football Magazine chhuak tur chuan cover-ah Ronaldo hmangin 2016 Ballon d'Or winner a nih thu an tarlang!

France Football Magazine-ah hian Cristiano Ronaldo chuan Golden Ball a keng lai tarlan a nih bakah 2016 Ballon d'Or winner a nih thu tarlan a ni a. Ronaldo hi 2016 Ballon d'Or winner a nih pawhin Paris-ah he lawmman hlu tak hi a dawng thei dawn lova, Club World Cup championship khel turin Japan an thleng tawh a ni.

Ballon d'Or hi France Football magazine buatsaih a ni a, Fifa nen an thawk ho thin, mahse tun hmaa an kal thin dan angin anmahniin he lawmman hi buatsaih an duh ta zawk a, Fifa nen an thawhhona an titawp ta a. Ram hrang hrang Football coach leh captain ten vote an thlak tawh dawn lo bawk a ni.

61st Golden Ball award hi chanchinbumite chauhvin an thlang dawn ta a, zanin dar 10 hian Paris-ah winner puanna function an hmang dawn a ni. Kum dangah chuan he award an puang lai hi TV lamah kan hmu thei a, kuminah erawh India ram atangin kan hmu thei lo maithei.

Kuminah Champions League title a lak bakah Portugal chu Europe champion a nihpui. Portugal captain kum 31 mi Cristiano Ronaldo hi kumin Ballon d'Or dawng tura rinkai ber a ni a. Ballon d'Or hi Ronaldo hian vawi 3 a dawng tawh a, kumina a dawng a nih chuan vawi 4 a dawng dawn tihna a ni. Barcelona forward Lionel Messi chuan Fifa Ballon d'Or vawi 5 dawng tawhin kuminah khel tha viau mahse Ronaldo a khum a rinawm loh a ni.