04 Apr 2016 09:06

Inkhel

Mizo Sports Website hmasa ber

​2016 Argentina MotoGP-ah Marquez pakhatna

Repsol Honda rider Marc Marquez chu Argentina MotoGP-ah pakhatna a ni a, nikum lama pakhatna Yamaha rider Rossi chu pahnihna niin Ducati rider-te pahnih a tawp dawna an chet sual avangin Honda rider Pedorsa chu pathumna a ni ta a ni.

Qualifying-ah Scott Redding tyre chiangkuan loh avangin Michelin chuan intlansiaknia ke thar vuah vek tum mahse ke thar hmang lova lap 25 chu lap 20-a tih tlema, intlansiak laklawh laia bike thlak mai rel an ni ta a.

Termas de Rio Hondo-ah khua a hnawng hle a, lap 9,10 leh 11-naah Flag-to-Flag dan hman a ni ta a. Hei hi intlansiak ti danglamtu ber chu a ni chho ta bawk a ni. Hetiang chiah hian 2013 khan Phillip Island-ah Bridgestone ke buaina an tawk tawh a, Flag-to-Flag dan hman a lo ni tawh bawk a ni.

Pole atangin Marquez chuan bul tan mahse Dovizioso chuan intlansiak hma a hruai nghal a. Kawi khatnaah Iannone a chesual teuh hle a, Marquez a tai nghe nghe, hetah hian an tlu lo hlawm hlauh a, Marquez a vannei hle.

Rossi chuan bul tan tha lo mahse pahnihnaah a awm chho a. Mahse lap thum an tlan chiah tihin Marquez a rawn duk chho a, Rossi leh Dovizioso te rawn pelin hma a rawn hruai ta a ni.

Lap 5 an tlan tling tihin Champion lai Lorenzo a tawlh chhuak a. Lap 9-naah Rossi chuan hmahruaitu Marquez pel zuk mahse Marquez chuan a pel lehnghal vat a. Hemi hnu hian pit-ah lutin an bike an thlak a. Pit atanga an rawn chhuah hnu hian Marquez chu a fal ta nalh a, Rossi erawh a hma a phak ta lo a ni.

Pahnihna dinhmunah Rossi a him lo, Suzuki rider Maverick Viñales chuan Rossi-a mawng a hiat reng, a vawi khat nan podium chan ngei tum mahse lap thum la awmin turn 1-ah Maverick Viñales chu a chesual ta hlauh a.

Hemi hnu hian Ducati rider pahnih Andrea Iannone leh Andrea Dovizioso te chuan Rossi an rawn pel a, podium chang ve ve thei dinhmuna an din laiin last lap corner tawp berah Andrea Iannone chuan Andrea Dovizioso a tai thlu a, an pahnihin an tawlh chhuak ta a. Andrea Dovizioso erawh a innawr thleng hram a, 13-na a ni ta a ni.

MotoGP Argentina GP Result :

1. Marc Marquez

2. Valentino Rossi

3. Dani Pedrosa

4. Eugene Laverty

5. Hector Barbera

6. Pol Espargaro

7. Stefan Bradl

8. Bradley Smith

9. Tito Rabat

10. Alvaro Bautista

11. Aleix Espargaro

12. Michele Pirro

13. Andrea Dovizioso

Andrea IannoneITA

Cal CrutchlowGBR

Maverick Viñales

Scott Redding

Loris Baz

Jorge Lorenzo

Jack Miller

Yonny Hernandez