Season liamta khan Premier League-ah pahnihna an ni. Title pakhat tal pawh an la lo, season tha lo tak an hmang niin kan ngai a ni maithei. Mahse 2014-15 season kha ngaihtuah let leh ila, Manchester City kha team tha tak an ni kan ti vek ang.
2014-15 season an khel chhe lo, League top scorer Aguero an neih bakah Man City kha 2014-15 League top scorer an ni bawk a, Man City hian goal 73 an khung a, Champions Chelsea aiin goal 10 laiin an khung hnem zawk.
Chelsea khan chak loh vawi thum chiah an neih laiin Man City erawhin vawi 7 an nei a, kha kha an danglamna ber a ni ta a ni. Tin, Champions League-ah Barcelona-in Round of 16 atangin an hnawtchhuak a, kan dem viau a ni maithei, mahse an hneh loh kha champion an ni tlat si a, Round of 16 pawh pal tlang lo mahse team chhia an ni kan ti thei lo hrim hrim.
An chet that theihna chhan tur te
English player an chhuah tir nual, chutah to takin Raheem Sterling an lei, Fabian Delph leh Patrick Roberts an lei chhunzawm bawk. Tlar hmaah Aguero chuan kawppui tur tha tak che rang bawk si Sterling a nei tawh dawn. Season hmasaa top scorer hian season hmasa ai khan goal a khung thei daih zawk maithei a ni.
Yaya Toure a la cham dawn, Premier league mai ni lo, khawvela midfielder tha ber pakhat a ni mek, ani hi Manchester City innghahna a ni a, a chhuak lo hi Manchester City chet that theihna chhan tur a ni leh ngei dawn bawk a ni.
An chet chhiat theihna chhan turte
Hmatawng lamah duh thala rem tur player a neih laiin hnung lam ngaihven tur midfielder tha tak Pellegrini hian a la nei lo cheuva, hei hi season liamtaa an chet chhiat chhan pawh a ni chiah mai. Goal khung hnem mahse an lamah a lut hnem ve thova, season hmasa khan goal 83 khung mahse goal 38 lai an chhuah a, kha khan an dinhmun nasa takin a tih hniam phah ta a ni.
Zawhna lianta awm thei te chu !
1) Academy naupangte khawnge an awm hlawm ?
Manchester City hian Academy tha tak neih tumin kum 5 liamta vel atang khan theih tawp an chhuah a nih kha. Mahse an naupang rawn tha chhuak sawi tur an nei lo hian harsatna a siam tlat mai.
Season liamta khan Financial Fair Play vangin player an khawm tak tak thei lo. Kuminah erawh Sterling to takin an lei a, a bak erawh to takin an lalut thei tawh hrih dawn lo a ni maithei, an reh ta hmak mai. Hengah chiah hian a nia, Academy naupang rawn puitling chhote tangkaina tur chu.
2) Bony hian hmun a chang angem ?
Hei hi zawhna lian tak a ni. Aguero chu a dam that chuan khawih chet thiang lo khawpa vohbik a ni a, £49m-a Liverpool atanga an lei Sterling pawh hi a dam tha a nih chuan man to tak bench-a dah thu a awm bawk si lova, chuvang chuan a start ngun hle a rinawm bawk.
Inhliam hrat leh 100%-a fit hleithei lo Ivorian striker Wilfried Bony hian hmun a chang angem ? Pellegrini hian 4-4-2 formation hmang chho leh tase, Aguero leh Sterling hi a inkawp tir thut maithei. Bony hian hmun a chang lo a nih chuan City chhuahsan leh vat a duh maithei, hei hi ven uluk a ngai dawn hle niin a lang.
3) Champions League Last 8 an tleng zo angem ?
Europe-ah an che ropui hleithei lo. Round of 16 bak an pel hleithei lo. Champions League -a hming chher tum hle mahse Barcelona chuan vawi hnih lai an pet chhuak tawh bawk a nih kha, 2011-a Champions League an khelh tan atang khan game 10 hnehna an chan laiin game 12 lai an chak lo.
Knock out stage chu an thleng ve mai zel a, mahse an thleng sang tak tak thei lo. Kumina an tum ber tur pakhat chu Premier League champion chu ni bawk mahse Champions League-a dinhmun tha taka invawrh a ni dawn a ni.
Key Player : Aguero
Season hmasa khan Premier League goal 26 a khung, kum 27 mi hi a fit a nih chuan ani aia striker tha tunlai Premier League striker zingah an awm chuang lo. Sterling nen an inkawp fuh a nih ngat phei chuan goal a khung zel a rinawm. Mahse hlauhthawn rukna City hian an nei tlat mai. Chu chu a inhliam leh ang tih hi a ni.
Inhliam hrat tak a ni a, season tluanin damin a khel thei angem ? A khelh theih loh chuan Negredo an chhuah tir tawh bawk si a, Bony hi a rintlak angem ? Chu chu Man City champion leh champion loh hriltu ber tur pakhat a nih dawn hmel.
League title lak theihna chance an nei em ?
Nei chiang e, team khawng an ni a, tun nipui bazara an player lakkhawmte hian nasa takin an pui bawk dawn. Goal khung an harsat lova, sawi tawh angin goal chhuah pawh an awlsam ve thova, defence lam an insiam rem that chuan Champion theihna chance nei hnem ber zing ami an ni.
Hetih lai hian tun season-a League title emaw, Champions League title emaw an la lo a nih chuan Pellegrini hi an ban ngei a rinawm tawh. Season liamta tawp lamah khan an ban ngei dawn niin a lang, mahse club hotute zahngaihna a dawng a, trophy chawi miah lo mahse rawih chhunzawm a ni ta a, kumin hian Europe-ah emaw Premier League-ah emaw, an che chhia a nih chuan season laklawhah pawh an ban mai a rinawm a ni.