Match hnuhnung berah La Liga champion kan hre ta a, Barcelona chuan Suarez-a hattrick hmangin si thum faiin Granada an hneh a, a zawnin Barcelona hian La Liga title an la ta a ni.
Real Madrid chuan Ronaldo goal hnih hmangin si hnih faiin Deportivo hneh mahse Barcelona chuan hnehna an chan avangin an champion ta tho tho a, khelh 38 atangin Barcelona-in 91 points an nei a, Real Madrid chuan 90 points an nei a, point khat chiahin an inthlau a ni.
Kum 2009 hnuah a vawikhat nan La Liga chuan Cristiano Ronaldo leh Lionel Messi nilo season khata goal khung hnem ber (top scorer) leh Golden Boot dawngtu tur an nei ta a, chu pa chu goal 40 khungtu Barcelona striker Luis Suarez a ni.
Granada an hneh tuma Barcelona goal hmasa ber hi 22 mins-a lut a ni a, Neymar ball pek tha zet chu Alba chuan mual veilam sir atangin a cross a, awlsam takin Suarez chuan a pet goal. Goal hnihna hi 38 mins-a lut a ni a, mual dinglam sir atanga Alves cross chu Suarez chuan a tauh goal a, second half hun tawp dawn minute 4 la awmin Neymar pass chu awlsam takin Suarez chuan a pet goal a, si thum faiin Barcelona chuan Granada CF an hneh ta a ni.
April ni 1 khan point 9 laiin Barcelona hi an sang fal a, mahse El Clasico-a an chak loh atang khan point an hloh chho ta malh malh a, Atletico Madrid leh Real Madrid te chuan an pel teuh thin hle, mahse a tawpah erawh Barcelona an dingchang ta a ni. May ni 22 hian Sevilla nen Copa de Rey final an khel dawn a, heta an champion a nih chuan trophy lian pahnih an la thei dawn a ni.
Barcelona sawi chuan Messi a langsar ber thin. Vawiinah erawh thil a danglam chho ta mek e, khawi hmunah pawh kal se goal khung teuh thin Suarez chu striker ropui a nih zia khawvelin an pawm thlap thlap tawh, mi a seh chungchang tuman an sawi tawh lo, a goal khung theih zia hlir an sawi ta a ni.
Messi, Suarez leh Neymar te hian Barcelona tan an thawh hlawk hle a, an pathum goal khung belhkhawm chu goal 90 lai a ni a, tun season La Liga-ah Barcelona chuan goal 112 an khung a, heng zinga goal 90 te chu khawvela attacking trio tha ber pakhat MSN te khung a ni.
Suarez chuan goal 40 a khung a, Messi chuan goal 26 khungin Neymar chuan goal 24 a khung a ni. Tunge Ballon d'Or dawng ang? Tih zawhna a lo piang nghal a. Real Madrid hian Champions Legue final an lut a. An champion hlauh a nih chuan Ronaldo leh Suarez te chu Ballon d'Or dawng thei tura inel tur ber an ni dawn niin a lang.
Guardiola-a'n Barcelona a enkawl lai khan tlar hma lamah player lian an neih loh avangin a hun tawp lamah khan Barcelona-in plan B an nei lo an ti thin a nih kha. Liverpool atanga Suarez-a'n Barca a zawm hnuah erawh Barcelona hian game khelh dan chi hrang hrang an nei ta a, Messi an dan pawhin Neymar-a'n goal a khung a, Neymar an dan pawhin Suarez a la awm zel thova, hun engemaw chen chhung chu team hlauhawm tak an la ni chhunzawm zel thei dawn niin a lang.
Pictures Credit : Reuters & Getty