Novak Djokovic chuan a khingpui Grand Slam Nomawi chawi hnem ber ni mek, kum 33 mi Roger Federer chu 7-6, 6-7, 6-4, 6-3 a hnehin a tum 3-na atan Wimbledon nomawi a chawi leh ta, nikuma champion hi kuminah pawh khing zo reng an awm lo, kum 28 mi Serb tennis star hi a zawnin Wimbledon-ah a champion ta a ni.
Novak Djokovic hian Grand slam title 9 a la ta a, tennis player ropui ber zing ami Agassi record a nih rual pui ta a ni. Tin, Federer, Connors, Agassi, Lendl, Emerson leh Sampras te hnung zuiin Grand Slam-ah vawi 200 a chakna mel lung pawimawh tak a phum ve ta bawk a, vawi 200 chak thei hi an tam lua lo a ni.
Roger Federer tan chuan a uiawm hle khawp ang le, Vawi 8 Wimbledon champion nih theihna hun tha tak a ni, mahse Djokovic hneh turin a theihna in a tlin ta lo. Final match hmuhnawm tak a ni a, Federer ropui zia kan la hmu a, a thiam hi chu a lo la thiam chiang a ni. Chutih laiin kum 33 mi a ni chho ve ta a, naupang zawk tha za zek zawkte pawhin theih tawpa an tum hnuah an hneh hram a ni mai, hei vang hian Federer kan fak lo thei lo.
A hun tawp lam a hmang chho ve dawn tawh niin a lang a, nakkumah chuan kum 34 mi a ni ve tawh anga, engtia rei nge Tennis hi a khelh dawn tih sawi thei lo mah ila kum hnih khat bak tha taka a khelh theih a rinawm tawh lo a ni.
Roger Federer chuan, " Set hmasa berah khan hun tha ka nei a, set hnihna ka la ta hram. Set thumnaah pawh hun tha chu ka nei tho. Mahse Novak kha a tha zawk a, ka khel chhe em em chu a ni hran lo", tiin a khingpui a fak tel bawk.
Novak hian kumin Australian open Nomawi chawi mahse French Open-ah erawh Final-ah Wawrinka a hneh lovaa, kum khata Grand Slam 3 na, Wimbledon-ah erawh a rawn tho leh a ni. US open a la awm cheu a, heta tha taka khel thei tur hian inrintawkna a nei tha tawh fu ngei ang. Kuminah vawi 48 zet a chakna niin vawi 3 a tlawm ve tawh bawk.
photo credit : wimbledon.com