14 Sep 2015 04:18

Inkhel

Mizo Sports Website hmasa ber

​2015 US Open champion Novak Djokovic

Novak Djokovic chuan 6-4,5-7,6-4,6-4 in Roger Federer a hneh a, 2015 US Open champion a ni ta. Novak hian Grand Slam 10 a la ta a, US Open-ah vawi hnih a champion-na a ni bawk a, vawiin hian $3.8m cheque a hum ta ran mai le.

Ruah vangin darkar thum laiin an khel tlai a, Flushing Meadows-a inkhel hmuhnawm takah an inhnehtawk dun hle a, Novak chuan set hmasa ber a la a, Federer chuan set hnihna a la thung. Set thumna Djokovic chuan a la hram, set lina a hmuhnawm, Novak chuan 5-2 in hma hruai mahse Federer chuan 5-5 in a rawn nih rual a, Grand Slam vawi 17 lai la tawh Federer a chak nge nge dawn niin mipui te chuan an ngai tawh hman, mahse a tawp a tawpah chuan thalai zawk tha chu a lo tlo zawk a, Djokovic a chak ta a ni.

Kum 34 mi Federer hian major title 18 lak inbeisei hle mahse kum 28 mi Djokovic a chak zawk ta si a, Novak hian kumin Grand Slam pathum a la ta a, kumin Grand Slam match 28-ah Djokovic hian vawi 27 hnehna a chang ta a ni.

"Season duhawm tak a ni, 2011 hnua ka hun hman that ber a ni mek. Kum dangah pawh ka lo che tha tawh tho nain kumin erawh Pa ka ni ve tawh a, chu chuan min ti hlim zual a ni." tiin World number one Djokovic chuan a sawi.

US Open-a vawi 5 lai lo champion tawh Roger Federer hian New York-ah tantu a ngah hle a, 2009 hnua final a luh leh hmasak berah mipui lamin an au ring thei hle. Kum 34 mi a ni tawh a, Flavia anga tennis a chawlhsan tur thu a puan mipuiin ring. Mahse Federer chuan,"Nakkumah kan inhmu leh dawn nia," tia a'n sawi chiah chuan ring takin mipui an au a, Djokovic-a champion lawma au thawm aiin a tha daih zawk nghe nghe a ni.