September ni 24, 2015 khan Mizoram Under 14 team chuan 3-2 in Afghanistan an hneh a, 2015 Subroto Cup Under 14 champion an ni ta a ni.
Mizoram tan Chhunga Hmar chuan goal hnih a khung a, Norbert Lalfakawma chuan chakna goal a khung a ni. Ambedkar Stadium, Delhi-a final hmuhnawm takah Mizoram chuan Chhunga Hmar hmangin si hnih faiin hma an hruai, mahse Afghanistan lamin goal hnih second half-ah an rawn khung ve leh si a. 2-2 in an inhnehtawk a, extra time khelh a ni ta a.
Extra time second half-ah Norbert Lalfakawma chuan goal mawi tak khungin Mizoram chu 3-2 in a chakpui ta a ni. Mizoram hian mimal lawmman awm thei zawng zawng an hui vek a. Best player-ah final-a goal hnih khungtu Chhunga Hmar thlan a ni a, tournament chhungin goal 5 a khung a ni. Chhunga Hmar hi Best Promising player-a thlan a ni bawk. Best goalkeeper-ah Lallawmkima thlan a ni a, Best coach-ah Lalthawmmawia thlan a ni bawk a ni.
Mizoram 3-2 Afghanistan
Mizoram scorers : Chhunga Hmar x 2, Norbert Lalfakawma
Ambedkar Stadium, Delhi-a final hmuhnawm takah Mizoram chuan Chhunga Hmar goal hnih hmangin si hnih faiin hma an hruai a, Chhunga goal hnihna kha a mawi khawp mai, Norbert-a ball pek tha zet chu box pawn atangin Chhunga hian kawh zetin a pet goal a ni. Afghanistan lamin goal hnih hun pangaiah an rawn khung ve leh hlauh a, an si phurh an rulhna goal phei chu hun tawp dawn tak tak injury time-ah a ni a. Tichuan hun pangaiah 2-2 in an inhnehtawk a.
Under 14 Subroto Cup 2015 Champions Mizoram goal hnuhnung berVideo : Mizoram chakna goal Norbert-a khung lai
Posted by inkhel.com on Thursday, September 24, 2015
Extra time khelh a ni a, Mizoram hian an nawr hle a, first half-ah goal a lut lo, second half minute 5 la awmin Norbert Lalfakawma chuan Mizoram chakna goal a khung ta. Mual ding lam sir atanga Chhunga ball vawrh tha zet chu Afghan defender ten an clear tha lo, hei hi vawi khatah Norber chuan a volley/push nghal a, sir takah a thlawk lut ta, hun a tawp chhunzawm a, Mizoram chuan 3-2 in hnehna an chang ta a ni.
Kum 1998 khan S. Malsawmtluanga telna Mizoram team chuan a vawi khatna atan Subroto Cup Under 14 final an lut a, hemi hnu hian India rama school inelna ngaihhlutah hian Mizoram team hi tum li an champion ta a, Mizoram team hi Govt. Chawngfianga Middle School aiawhin an kal a ni.
Mizoram hian final kalkawngah yellow card vawi khat chiah an hmu a, disciplinary record an nei ṭha hle. Group stage-ah Haryana (11-0) leh Odhisa (2-0), quarterfinal-ah Jharkhand (3-1), semifinal-ah West Bengal (3-1) te an hneh a, final-ah 3-2 in hnehna an chang a, Tournament chhung zawngin goal 22 an khung a, goal li chiah an chhuah a ni.
Govt Chawngfianga Middle School hminga kal Mizoram Under 14 team hi Directorate Sports & Youth Services Department tirh an ni a, Regional Sports Centre (Saidan, Kolasib)-a zirlaite an ni.
Coach : Lalthawmmawia (Mamawia) NIS football.
Manager : Lalrinliana Royte, NIS Volleyball coach.
Players : R.Malsomkima, Armed Veng South; Lallawmkima, Dinthar, Aizawl; F.Malsomzuala, Champhai; F.Lalruatkima, Bairabi; Remlalfaka, Farkawn; Norbert Lalfakawma, Kolasib Venglai; R.Lalrinawma, College Veng, Aizawl; Kamlianthanga, Seling; Moses Lalrinzuala, Khatla East; Chhunga Hmar, Electric Veng; Remsangpuia, Denlung; Hriata Jongte, Armed veng South; MC Zothansanga, Tawipui South, Lunglei; Lawrence Ngursangzuala, Melriat; Peter Lalsiammawia, Saidan, Kolasib; R.Lalrinhlua, College Veng, Aizawl.