2015 NBA Champions Golden State Warriors

17th June 2015, 03:06PM

June ni 17, 2015 zingkar khan Quicken Loands Arena, Cleveland, Ohio-ah NBA Final game 6-na khelh a ni a, Golden State Warriors chuan 105-97-a Cleveland Cavaliers hnehin 2015 NBA Champions an ni ta a, 1975 hnua a vawi khat nan trophy ropui chu Bay Area lamah an hawn dawn ta a ni.

He match hmuhnawm takah hian LeBron James chuan 32 points neiin, 18 rebounds leh 9 assists nei mahse 3rd quarter-a Warriors che ropui lutuk chuan LeBron James -a ropuina a dal ta a, Final vawi 6 lo khel tawh leh MVP vawi 4 lo ni tawh LeBron James leh a pawlte an chak ta lo. Series-ah Warriors hian 4-2 in hnehna an chang a, an champion ta a ni.

NBA Finals MVP Andre Iguodala chuan 25 points neiin assists vawi 5 a nei a, Stephen Curry chuan 25 points neiin assists vawi 8 leh rebounds vawi 6 a nei bawk a ni. Draymond Green pawh a che ropui hle a, triple double neiin, 16 points, 11 rebounds leh 10 assists a nei bawk.

Regular season leh post season-ah Warriors an che ropui hle a, regular season-ah 67-15 records an nei a, post season-ah 16-5 records an nei bawk a ni. Game 6-ah hian Cavaliers chuan player hliam hman theih loh an nei nual a, Kevin Love, Kyrie Irving leh Anderson Varejao-te khelh loh a langsar hle.

Quarter khatnaah 28-15 in Warriors-in hma an hruai a, 2nd quarter-ah erawh Cavaliers an rawn che tha a, half time a nih chuan 45- 48 in Cavaliers hian an rawn hnaih tawh. Third quarter-ah erawh Warrios hian 28 points an siam laiin Cavaliers hian 18 points an nei a, 4th quarter-ah Cavaliers hian um viau mahse an umphak ta lo a ni.

Copyright © inkhel.com 2024. All rights reserved.