Arsenal chuan 4-0 a Aston Villa hnehin 2015 FA Cup champions an ni ta a, nikum champion team hian an title humhimin, FA CUP-a champion ngun ber an ni ta a, Manchester United nen khan vawi 11 an champion a, tunah chuan vawi 12 an champion ta a ni.

Wembley Stadium-ah Arsenal tan Walcott, Sanchez, Mertesacker leh Giroud ten goal an khung a, goal hmasate pahnih a mawi dun hle. 2004 hnua vawi hnih FA Cup champion thei an ni chhunzawm a, Arsene wenger-a hnuaihah Arsenal hian tum 7 ngawt FA Cup final an lut a, vawi 6 an champion ta a ni.

Arsenal-in FA Cup an chawi ruala lawm em em chu Southampton an ni a, FA Cup champion team hian Europa League an khel thei a, hetih lai hian Arsenal hian Champions League an khelh dawn si avangin kum danga pahnihnain Europa League an khelh thin kha kuminah chuan League lamah an suan ta daih a, Premier League-a pasarihna Southampton chuan kum tharah Europa League an khel dawn ta a ni.

Arsenal 4-0 Aston Villa

Walcott 40′ Sánchez 50′ Mertesacker 62′ Giroud 90′

Arsenal : Szczesny, Bellerin, Mertesacker, Koscielny, Monreal, Coquelin, Cazorla, Ramsey, Özil (Wilshere - 77' ), Sánchez (Oxlade-Chamberlain - 90' ), Walcott (Giroud - 77' )

Aston Villa : Given, Hutton, Okore, Vlaar, Richardson (Bacuna - 68' ), Cleverley , Westwood (Sánchez - 71' ), Delph, , N'Zogbia (Agbonlahor - 53' , Benteke, Grealish

Goal hmasa ber hi first half tawp dawn minute 5 la awma lut a ni a, mual veilam sir atanga ball tha tak chu Sanchez chuan Walcott tan tha zetin a tauh let a, Walcott hian near post-ah kawh zetin a pet goal chhunzawm. Goal hnihna hi 50th mins-a lut niin, he goal zet chu a ropui ngei mai. Box pawn atangin Sanchez chuan kawh pawtin a pet a, a thlawk kawi zawr bawk. Given tan dan ngaihna a awm lo, a zawn deuh maia kal ni mahse a dang hman ta lo a ni.

Goal thumna hi set piece atanga lut niin, corner atanga Cazorla pet tah zet chu 6 yard box-a lo awm Mertesacker chuan a tauh goal ta mai a, hun tawp dawn tak tak 90+2 mins-ah Giroud chuan goal khat a rawn khung ve leh hram a, mual dinglam sir atanga Chamberlain cross tha zet chu a ke veilamin mawi takin a kheng goal a, 4-0 in Arsenal chuan hnehna an chang ta a ni.

He match-ah hian Arsenal hian goal khung teuh theihna chance an nei a, Aston Villa hian an hneh lo kher mai. Given-a hmel kan hmu zauh zauh reng a, Koscielny tauh a lo save te kha pui tak a ni. Tin, Ramsey goal khung tur pawh tha zetin a lo dang nghe nghe. Villa hian penalty hlawh chhuah theihna chance tha zet vawi hnih an nei a, a vawi khatna chu box pawn chiah chiahah Agbonlahor tihtluk a ni a, en mai chuan penalty a ang khawp mai.

Mahse referee Jonathan Moss chuan a hmu lo hlauh a. Hemi hnu hian Grealish chu box chhungah Bellerin chuan a ti tlu leh a, mahse referee chuan a ham chuang lo a ni.

Inkhelh pumpui thlir chuan Arsenal an chungnung zawk a, champion pawh an phu zawk. Ball possession-ah 58% Arsenal hian an nei a. Shots vawi 16 lai an nei, heng zinga vawi 9 chu goal zawnah a kal. Villa erawh chuan shots vawi hnih chiah an nei a, goal zawnah a kal lo ve ve a ni.