31 May 2015 08:52

digimalt

​2015 Copa del Rey Champions Barcelona

Spanish Cup final-ah Barcelona chuan 3-1 in Athletic Bilbao an hneh a, Barcelona chu 2015 Copa del Rey champion an ni ta a ni. Barcelona tan Lionel Messi chuan goal hnih khungin, Neymar chuan goal khat a khung bawk a, Athletic club tan Williams chuan goal khat a khung ve bawk a ni.

La Liga Champions hian Copa del Rey title an la chhunzawm a, June ni 6 hian Berlin-ah Italian Champions Juventus nen Champions League title an inchuh dawn a, hetah hian Barcelona an champion a nih ngat chuan trophy lian an treble thei dawn a ni.

Athletic Bilbao 1-3 Barcelona

(Williams 79') (Messi 20', 74', Neymar 36')

Athletic Blibao : Herrerín Buisán, Bustinza Martínez, Etxeita, Laporte, Balenziaga, San José, Etxebarria Urkiaga (Gómez - 75' ), Iraola (Susaeta - 58' ), Rico Moreno (Iturraspe - 74'), Williams, Aduriz

Barcelona : ter Stegen, Dani Alves, Piqué, Mascherano, Alba (Mathieu - 77' ), Rakitic, Busquets , Iniesta (Xavi - 56' ), Messi, Suárez (Pedro - 78' ), Neymar

Ref: Carlos Velasco Carballo

Att: 99,354

Messi ropui zia atang bawkin bul kan tan leh dawn ta a ni e. 20th mins-ah Goal ropui lutuk, Copa dey Rey final-a goal ropui ber pawl ni tur Messi chuan a khung. Mual dinglam sirah ball kengin Athetic defender pali a bum tlang hnuah box chhungah a luhpui a, near post-ah kawh zetin a pet goal chhunzawm.

Goal hnihna hi 36th mins-a lut a ni a, Barcelona hmatawngte chet dan a mawi leh kher mai. Hei hi chu team goal a ni a, Messi leh Rakitic te ball inpek hnuah Suarez tan box chhunga through ball tha tak siam a ni a, Suarez hian mahnia pet goal mai ta lo chuan box veilama Neymar tan a siam leh chhawng a, Neymar hian chiang zetin a pet goal chhunzawm ta a ni.

Goal thumna hi second half 74th mins-a lut a ni a, hnai set sawt atangin Messi hian goal hnih na a khung a, tun season competition hrang hrangah Messi hian goal 58 a khung tling ta a ni. Messi, Suarez leh Neymar-te pathum inkawp hian tun season-ah goal 120 lai competition hrang hrangah an khung tling ta bawk a ni.

Hun tawp dawn minute 10 la awmin Athletic Bilbao chuan Williams hmangin goal khat an khung ve hlauh a, Williams head goal bak hi Bilbao hian goal dang an khung chhunzawm thei tawh lo, second half-ah Barcelona chhuahzan tur Xavi chuan Iniesta a rawn thlak a, thawm a tha kher mai. Hun tawp dawn minute 10 la awmin khelh hun chang tlem tak Pedro chuan Suarez a rawn thlak bawk a ni.

Inkhelh zawhah Neymar chuan a thianpa Messi chu nasa takin a fak a,"Leo hi a ropui dangdai thlawt a ni, player ropui a ni e. Ka tan chuan khawvela player tha ber a ni, a kianga ka khel ve thei pawh hi ka inchhuang khawp mai," tiin a sawi.